আজি চিৰাং জিলাৰ ঘন অৰণ্য আৰু ৰিপু সংৰক্ষিত বনাঞ্চলত সেনা আৰু সশস্ত্ৰ সীমান্ত বাহিনী (এছ এছ বি)য়ে যুটীয়াভাৱে এটা বৃহৎ তথা ব্যতিক্ৰম অভিযান চলাইছে এন ডি এফ বিৰ সংবিজিত গোটৰ এজন শীৰ্ষ নেতাক ধৰিবৰ বাবে। এই অভিযানত সেনাই হেলিকপ্তাৰো ব্যৱহাৰ কৰা দেখা গৈছে। ঘন অৰণ্যৰ মাজত চলোৱা এই অভিযানৰ লক্ষ্য হৈছে সংগঠনটোৰ বাথা নামৰ এজন দুৰ্ধৰ্ষ নেতাক ধৰা।
সেনাৰ সূত্ৰৰ পৰা গম পোৱা মতে, সেনাৰ বৃহৎ সংখ্যক জোৱান আৰু এছ এছ বিৰ জোৱানে এই অভিযানটোত ভাগ লৈছে। সেনাই জনোৱামতে বাথাৰ সময় চমু চাপি আহিছে। অৱশ্যে এই প্ৰতিবেদন প্ৰস্তুত কৰাৰ সময়লৈকে বাথাক ধৰা বা কোনো সংঘৰ্ষৰ বাতৰি অহা নাই।
আনহাতে স্থানীয় গাওঁবাসীয়ে জানিবলৈ দিয়ামতে আজি দিনটোৰ আগ ভাগতে হেলিকপ্তাৰৰ সহায়ত জোৱানসকলক দুৰ্গম অঞ্চলত নমা দেখা গৈছিল। ইমান বৃহৎ সংখ্যক সেনা জোৱান আগতে তেওঁলোকে কেতিয়াও দেখা পোৱা নাছিল বুলি জানিবলৈ দিয়ে।
সূত্ৰটোৱে জনোৱামতে, বাথা হ’ল এন ডি এফ বি সংবিজিত গোটৰ সেনাধিনায়ক জি বিদাইৰ অধস্তন পদাধিকাৰী। তেওঁৰ বিৰুদ্ধে ভালেকেইটা গোচৰ আছে। নেতাজনক বহু দিনৰ পৰা অসমৰ নিৰাপত্তা সেনাই সূত্ৰটোৱে কয় যে নেতাজনে তেওঁৰ কেইজনমান সহযোগীক লৈ চিৰাং আৰু ৰিপু বনাঞ্চলৰ কাষে-পাজৰে অৱস্থান গ্ৰহণ কৰা বুলি সেনাই পোৱা তথ্যৰ ভিত্তিত এই অভিযানটো চলোৱা হৈছে। কিছু দিনৰ পূৰ্বে বাথাই ভাৰত-ভূটান সীমান্তত অৱস্থান গ্ৰহণ কৰাৰ বিষয়েও সেনা অৱগত হৈছিল বুলি সূত্ৰটোৱে কয়।
