আজিৰে পৰা আৰম্ভ হোৱা ৩৩ সংখ্যক পূব মণ্ডল আন্ত:বিশ্ববিদ্যালয় যুৱ মহোৎসৱ ২০১৭-১৮ বৰ্ষৰ- প্ৰাগজ্যোতি মহোৎসৱ গুৱাহাটী বিশ্ববিদ্যালয়ত পাঁচ দিনীয়া কাৰ্যসূচীৰে ৯জানুৱাৰিলৈ অনুষ্ঠিত হ’ব। উল্লেখযোগ্য যে ২৫ বছৰৰ দীৰ্ঘ বিৰতিৰ অন্ত পেলাই গুৱাহাটী বিশ্ববিদ্যালয়ে এই বছৰ আয়োজন কৰিবলৈ সক্ষম হৈছে মহোৎসৱখনৰ।
ছাত্ৰ কল্যানৰ সঞ্চালক ৰঞ্জন কুমাৰ কাকতিয়ে মহোৎসৱ উপলক্ষে এখন সাংগঠনিক কমিটিৰ লগতে ১৯খন উপ কমিটি গঠন কৰা বুলি জনায়।
যুৱ মহোৎসৱৰ মুখ্য পৃষ্ঠপোষক হিচাপে আছে অসমৰ ৰাজ্যপাল জগদীশ মুখী। ইয়াৰ উপৰি অসমৰ মুখ্যমন্ত্ৰী সৰ্বানন্দ সোণোৱাল, শিক্ষা মন্ত্ৰী হিমন্ত বিশ্ব শৰ্মা,সাংস্কৃতিক তথা ক্ৰীড়া মন্ত্ৰী নৱ কুমাৰ দলৈ আৰু গুৱাহাটী বিশ্ববিদ্যালয়ৰ উপাচাৰ্য মৃদুল হাজৰিকাই মহোৎসৱটিক সাফল্যমণ্ডিত কৰি তোলাৰ বাবে পৃষ্ঠপোষকতা কৰিব।
আজিৰে পৰা আৰম্ভ হোৱা মহোৎসৱটিত পূব মণ্ডলৰ প্ৰায় ২৫ৰ পৰা ৩০খন বিশ্ববিদ্যালয়ে অংশ গ্ৰহণ কৰিছে বুলি জানিবলৈ দিছে সঞ্চালক ৰঞ্জন কুমাৰ কাকতিয়ে। তেওঁ লগতে কয়, ‘২৬টা বিভিন্ন বিষয়ক প্ৰতিযোগিতাত প্ৰায় ৮০০গৰাকী প্ৰতিযোগীয়ে অংশগ্ৰহণ কৰিব’। অসমক প্ৰতিনিধিত্ব কৰা বিভিন্ন জাতি-জনজাতিৰ সামাজিক-সাংস্কৃতিক বিষয়কলৈ প্ৰস্তুত কৰা কাৰ্যসূচীৰ পিছতে প্ৰতিযোগিতাখনৰ স্থান সমূহ নিৰ্ধাৰণ কৰি দিয়া হয়।
