নিষিদ্ধ ড্ৰাগছ সৰবৰাহৰ কৰিডৰ হৈ পৰিছে উত্তৰ- পূবৰ দুৱাৰমুখ স্বৰূপ গুৱাহাটী মহানগৰী। আজি গুৱাহাটী ৰে’লৱে ষ্টেচনৰ পৰা ৰেল’ৱে আৰক্ষীয়ে অভিযান চলাই বৃহৎ পৰিমাণৰ ড্ৰাগছ জব্দ কৰিবলৈ সক্ষম হয়।
এই সন্দৰ্ভত ৰে’লৱে আৰক্ষীয়ে জনোৱা অনুসৰি মণিপুৰৰ পৰা বাংগালুৰুলৈ নি থকা অৱস্থাতে যশৱন্ত এক্সপ্ৰেছৰ ৪ নং ডবাৰ পৰা বৃহৎ পৰিমাণৰ ড্ৰাগছ জব্দ কৰা হয়।
অনুসন্ধান কালত জানিব পৰা মতে আছিফ ৱাছিম(২৫) নামৰ মণিপুৰৰ যুৱকজনে এই ড্ৰাগছখিনি বাংগালুৰুত বিক্ৰী কৰিবৰ বাবে লৈ আহিছিল। মণিপুৰৰ লিলঙৰ এই যুৱকজনকো আৰক্ষীয়ে আটক কৰিছে।
ৰে’লৱে আৰক্ষী সূত্ৰই জনোৱা মতে ৪৫ গ্ৰাম ওজনৰ বগা হেৰ’ইনৰ ৩ টা পেকেট আৰু কমলা ৰঙৰ ৪০ গ্ৰাম ব্ৰাউন ছুগাৰ জব্দ কৰা হৈছে যাৰ বজাৰ মূল্য হ’ব প্ৰায় ৫০ লাখ টকা।
বৰ্তমান ৰে’লৱে আৰক্ষীয়ে আটক কৰা ড্ৰাগছ সৰবৰাহকাৰী যুৱকজনক সোধাপোছা অব্যাহত ৰাখিছে।
শেহতীয়াকৈ অসমত এনেধৰণে নিষিদ্ধ দ্ৰব্য সৰবৰাহৰ ঘটনা দিনকদিনে বৃদ্ধি পাইছে। উত্তৰ- পূৰ্বাঞ্চলৰ আন ৰাজ্যৰ পৰা বিশেষকৈ মণিপুৰৰ পৰা গুৱাহাটী হৈ বাহিৰলৈ গাঁজাকে ধৰি বিভিন্ন নিষিদ্ধ দ্ৰব্য সৰবৰাহৰ চেষ্টা অব্যাহত আছে। বিগত দুমাহত ৰে’ল আৰক্ষী আৰু ৰাজহ চোৰাংচোৱা বিভাগে গাঁজাৰ লগতে বৃহৎ পৰিমানৰ চোৰাং সোণ জব্দ কৰিবলৈ সক্ষম হৈছে।
শেহতীয়াভাৱে ওদালগুৰি আৰক্ষীয়ে এক অভিযান চলাই যোৱা ১৪ এপ্ৰিলৰ নিশা ওদালগুৰিৰ লালপুল আৰক্ষী চকীৰ অধীনৰ লালপুল অঞ্চলত এখন খালী চিলিণ্ডাৰ কঢ়িয়াই অনা ট্ৰাকত বৃহৎ পৰিমানৰ গাঁজা জব্দ কৰিছিল।
তাৰ পাছত আজি পুনৰ ৫০ লাখ টকাৰ নিষিদ্ধ ড্ৰাগছ জব্দ হোৱাটো লক্ষণীয়।
