বিভিন্ন সময়ত বহিঃৰাজ্যত অসমৰ লোকসকল আক্ৰমণৰ বলি হৈ আহিছে বুলি অভিযোগ পোৱা যায়। অসমৰ বাহিৰত অধ্যয়নৰত ছাত্ৰ-ছাত্ৰী, কামৰ সন্ধানত যোৱা লোকসকল বহিঃৰাজ্যত আক্ৰমণৰ সন্মুখীন হৈ আহিছে ৷ পুনৰবাৰ ইয়াৰ এক অনুৰূপ ঘটনাই নলবাৰীৰ এগৰাকী খেলুৱৈৰ ক্ষেত্ৰত সংঘটিত হয়। ছত্তিছগড়ত যোৱা ২৬ নৱেম্বৰত এজন খেল পৰিচালকে এজন খেলুৱৈক প্ৰহাৰ কৰাক লৈ নলবাৰী জিলাত প্ৰতিক্ৰিয়াৰ সৃষ্টি কৰিছে।
জানিব পৰা মতে, ছট্টিছগড়ত হোৱা সদ্য সমাপ্ত ৰাষ্ট্ৰীয় স্কুল গেইমছত নলবাৰী জিলাৰ দলুৱা গাঁৱৰ নিশান্ত ভৰালীক বহিঃৰাজ্যৰ দলৰ পৰিচালকে প্ৰহাৰ কৰে ৷ যোৱা ২৬ নৱেম্বৰত ছট্টিছগড়ত অনুষ্ঠিত ৰাষ্ট্ৰীয় স্কুল গেমছৰ প্ৰতিযোগিতাত অসম আৰু হাৰিয়ানাৰ দুগৰাকী খেলুৱৈৰ মাজত এখন উত্তেজনাপূৰ্ণ কিক বক্সিং খেল চলি আছিল৷ সেই সময়তে দৰ্শকৰ আসনত বহি অসমৰ খেলুৱৈজনক উৎসাহ যোগাই আছিল নিশান্ত ভৰালী আৰু আন কেইজনমান অসমৰ খেলুৱৈয়ে। সেই সময়তে খেলৰ মুখ্য পৰিচালকে কোনো কাৰণ নোহোৱাকৈ অসমৰ খেলুৱৈ সকলক তুচ্ছ্য তাচ্ছিল্য কৰাৰ লগতে নলবাৰীৰ নিশান্ত ভৰালীক প্ৰহাৰ কৰে। এই ঘটনাক সহজভাৱে ল’ব নোৱাৰি সেই সময়তে অসমৰ খেলুৱৈ সকল একত্ৰিত হৈ স্থানীয় বিলাশপুৰ আৰক্ষী থানালৈ গৈ ঘটনা সন্দৰ্ভত অৱগত কৰাৰ লগতে এজাহাৰ দাখিল কৰে ৷ কিন্তু মন কৰিব লগীয়া যে এজাহাৰ দাখিল কৰাৰ পাছতো আৰক্ষীয়ে বিষয়টোৰ ওপৰত কোনোধৰণৰ গুৰুত্ব আৰোপ নকৰিলে। এই অভিযোগ খেলুৱৈসকলৰ। তেওঁলোকে আৰক্ষীৰ এই পক্ষপাতিত্বত ক্ষোভ প্ৰকাশ কৰিছে।
