ছিকিমৰ চলচ্চিত্ৰ নিৰ্মাতা এঞ্জেল শ্বেৰিং লামুৱে পৰিচালনা কৰা চুটি ছবি ‘কিতাবে-দ্য বুক’ এ এসপ্তাহ পূৰ্বে মুক্তি পোৱাৰ পিছত য়ু টিউবত ধুমুহাৰ সৃষ্টি কৰিছে।
ছয় মিনিট ১৮ ছেকেণ্ডৰ চুটি ছবিখনৰ চিত্ৰনাট্যও এঞ্জেলে নিজেই লিখিছে আৰু অনলাইন দৰ্শকৰ পৰা বিপুল সমাদৰ লাভ কৰা দেখিবলৈ পোৱা গৈছে।
ছিকিমৰ টাডঙৰ ছিকিম চৰকাৰী কলেজৰ পৰা নেপালী ভাষাত স্নাতকোত্তৰ ডিগ্ৰী লাভ কৰা এঞ্জেলে অতি কম বয়সৰ পৰাই সাৱলীল লেখা লিখি আহিছে আৰু ইতিমধ্যে তেওঁ এলানি কবিতাও লিখিছে।
এঞ্জেলে মুম্বাইলৈ গৈ আৰ্ট অফ চিনেমা ইনষ্টিটিউটৰ পৰা ২০১৫-১৬ চনত চলচ্চিত্ৰ নিৰ্মাণৰ ডিপ্ল’মা পাঠ্যক্ৰম সমাপ্ত কৰে।
তাৰ পিছৰে পৰাই তেওঁ বহুতো মিউজিক ভিডিঅ’ আৰু চুটি ছবিত সহকাৰী পৰিচালক হিচাপে কাম কৰি আহিছে।
কিতাবে তেওঁৰ পৰিচালক হিচাপে প্ৰথমখন ছবি আৰু ইয়াৰ চিত্ৰনাট্যও তেওঁ নিজেই লিখিছে।
চুটি ছবিখনৰ বাবে আৱহ সংগীত ৰচনা কৰিছে তেওঁৰ গায়ক স্বামী ৰাজ চেত্ৰীয়ে।
