যোৱা শুকুৰবাৰে কলকাতা প্ৰেছ ক্লাব ভ্ৰমণ কৰে ছিকিম প্ৰেছ ক্লাবৰ কাৰ্যকৰী সমিতিৰ সদস্যসকলে।
এই ভ্ৰমণ কাৰ্যসূচীৰ লগত সংগতি ৰাখি প্ৰেছ ক্লাবৰ সদস্য আৰু সাংবাদিক সকলৰ মাজত এলানি মত বিনিময় কাৰ্যসূচী অনুষ্ঠিত কৰা হয়।
উল্লেখ্য যে ভ্ৰমণকাৰী দলটোৱে কলকাতা প্ৰেছ ক্লাবৰ সদস্য সকলৰ সৈতে এখন বৈঠকত মিলিত হোৱাৰ পাছতে ছিকিমত সাংবাদিকতাৰ উন্নয়নৰ বাবে কলকাতা প্ৰেছ ক্লাবে বিভিন্ন ক্ষেত্ৰত সহায় সহযোগিতা আগবঢ়োৱাৰ প্ৰতিশ্ৰতি প্ৰদান কৰে।
উক্ত কাৰ্যসূচীৰ মাজতে কলকাতা প্ৰেছ ক্লাবৰ সভাপতি স্নেহাশিস সুৰ আৰু ছিকিম প্ৰেছ ক্লাবৰ সভাপতি যোছেফ লেপছাই স্মাৰক বিনিময় কৰে। বৈঠকখনত প্ৰদীপ কুমাৰ চৌধুৰী, বুদ্ধদেৱ সেনগুপ্তৰ উপৰি দুয়োটা প্ৰেছ ক্লাবৰ ভালেসংখ্যক সদস্য, সাংবাদিক উপস্থিত আছিল বুলি এক বিবৃতিযোগে প্ৰকাশ কৰিছে ছিকিম প্ৰেছ ক্লাবে।
বৈঠকখনত লগতে জৈৱিক কৃষি, পৰ্যটনৰ সম্ভাৱনীয়তা আদি বিষয়ক সামৰি ছিকিম প্ৰেছ ক্লাবে শীঘ্ৰে এটা মত বিনিময় কাৰ্যসূচী অনুষ্ঠিত কৰিব বুলি সিদ্ধান্ত গ্ৰহণ কৰা হয়। তদুপৰি সমাগত সময়ত দুয়োটা প্ৰেছ ক্লাবে সাংবাদিকতা বিষয়ক কৰ্মশালা আদি অনুষ্ঠিত কৰাৰো সিদ্ধান্ত গ্ৰহণ কৰে।
স্মৰ্তব্য যে কলকাতা প্ৰেছ ক্লাবটো হৈছে ভাৰতত স্থাপন কৰা প্ৰথমটো প্ৰেছ ক্লাব।
