ৰংজেঙ বিধানসভা সমষ্টিৰ প্ৰাক্তন বিধায়ক দেছাং ছাংমাৰ বাসগৃহটো শনিবাৰে এক অগ্নিকাণ্ডত সম্পূৰ্ণৰূপে ভস্মীভূত হৈ পৰে। জানিব পৰা মতে বৈদ্যুতিক শ্বট শ্বাৰ্কিটৰ ফলতে অগ্নিকাণ্ডটো সংঘটিত হোৱা বুলি সন্দেহ কৰা হৈছে।
পূব গাৰো পাহাৰত অৱস্থিত এই বাসগৃহটোত অগ্নিকাণ্ডৰ ঘটনাটো সন্ধিয়া প্ৰায় ৬ বাজি ১৫ মিনিটমান বজাত সংঘটিত হয় আৰু অগ্নি নিৰ্বাপক বাহিনী আহি ঘটনাস্থলী পোৱাৰ সময়লৈকে জুই জ্বলি থাকে।
ঘটনাস্থলীৰ পৰা প্ৰায় ৫০ কিলোমিটাৰ আঁতৰৰ উইলিয়াম নগৰৰ পৰা অগ্নি নিৰ্বাপক সেৱাৰ গাড়ী আহিবলগীয়া হোৱাৰ বাবে বহু সময় অপেক্ষা কৰিবলগীয়া হৈছিল। উল্লেখযোগ্য যে ৰংজেঙত কোনো অগ্নি নিৰ্বাপক বাহিনীৰ কেন্দ্ৰ নাই।
অগ্নি নিৰ্বাপক বাহিনীৰ গাড়ী আহি পোৱাৰ সময়লৈকে প্ৰাক্তন বিধায়ক ছাংমাৰ গোটেই বাসগৃহটো জুইয়ে বিধ্বস্ত কৰি পোলাইছিল।
‘’আমি অগ্নিকাণ্ডৰ ঘটনাটো সংঘটিত হোৱাৰ পিছতেই খবৰ লাভ কৰিছিলো। অগ্নি নিৰ্বাপক বাহিনীৰ বিষয়াসকলে ততাতয়াকৈ ঘটনাস্থলীত উপস্থিত হ’বলৈ চেষ্টা কৰিছিল কিন্তু তেওঁলোকৰ তৎপৰতাৰ মাজতে গাড়ীখন গাঁতত পৰি গৈছিল। ডাঙৰ যন্ত্ৰটো মেৰামতিৰ প্ৰয়োজন হৈছিল আৰু উইলিয়াম নগৰৰ পৰা এটা অগ্নি নিৰ্বাপক বিচৰাৰ পৰিপ্ৰেক্ষিতত যোৱা কেইদিন ধৰি ই পৰি আছিল,’’-পূব গাৰো পাহাৰৰ আৰক্ষী অধীক্ষক ৰিংগ্ৰেঙ টি জি মমিনে এইদৰে কয়।
‘’অগ্নি নিৰ্বাপক বাহিনীৰ বিষয়াসকল আহি ঘটনাস্থলীত উপস্থিত হোৱাৰ আগেয়ে বেছি অংশ ইতিমধ্যে জুইত জাহ গৈছিল আৰু জুইয়ে গোটেই ঘৰটো আগুৰি ধৰিছিল। অগ্নিকাণ্ডটোত অৱশ্যে আন কোনো ঘৰৰ ক্ষতি হোৱা নাই,’-সূত্ৰসমূহে জনায়।
