বোকাখাতৰ জে ডি এছ জি মহাবিদ্যালয়ৰ খেল পথাৰত ২৮ জানুৱাৰীৰ পৰা অনুষ্ঠিত হোৱা ডিব্ৰুগড় বিশ্ববিদ্যালয়ৰ আন্তঃ মহাবিদ্যালয় এথলেটিকচ প্ৰতিযোগিতাৰ আজি সামৰনী পৰে৷
ডিব্ৰুগড় বিশ্ববিদ্যালয়ৰ মুঠ ২৩ খন মহাবিদ্যালয়ৰ ৩০০ ছাত্ৰ ছাত্ৰীয়ে তিনি দিনীয়া এই প্ৰতিযোগিতাত অংশ গ্ৰহন কৰে ৷
উক্ত প্ৰতিযোগিতাত উত্তৰ লক্ষীমপুৰ মহাবিদ্যালয়ে পুৰুষৰ শ্ৰেষ্ঠ মহাবিদ্যালয়ৰ সন্মান কৰাৰ বিপৰীতে মহিলাৰ শ্ৰেষ্ঠ মহাবিদ্যালয়ৰ সন্মান লাভ কৰে খোৱাং মহাবিদ্যালয়ে ৷
দীৰ্ঘ দূৰত্বৰ দৌৰৰ মহিলা শাখাত মৰিদ’ল মহাবিদ্যালয়ৰ ৰবীনা লাগাচু আৰু পুৰুষ শাখাত সাপেখাতী মহাবিদ্যালয়ৰ বিপুল সৎনামীয়ে শ্ৰেষ্ঠত্বৰ সন্মান লাভ কৰে।
আনহাতে উত্তৰ লক্ষীমপুৰ মহাবিদ্যালয়ৰ পিঙ্কু বৰুৱাই পুৰুষৰ শ্ৰেষ্ঠ জাম্পাৰ, যোৰহাট জে বি মহাবিদ্যালয়ৰ অভিলাষ বৰঠাকুৰে পুৰুষৰ শ্ৰেষ্ঠ স্প্ৰিন্টাৰ আৰু খোৱাং মহাবিদ্যালয়ৰ অনামিকা চুতীয়াই মহিলাৰ শ্ৰেষ্ঠ স্প্ৰিন্টাৰৰ সন্মান লাভ কৰে ৷
ইয়াৰ উপৰি চাবুৱাৰ ডি ডি আৰ মহাবিদ্যালয় শ্ৰেষ্ঠ নিয়মানুবৰ্তিতাৰ দল আৰু বোকাখাতৰ জে ডি এছ জি মহাবিদ্যালয় মাৰ্চ-পাৰ্টচৰ শ্ৰেষ্ঠ দল হিচাবে বিবেচিত হয় ৷
আজি বিয়লি জে ডি এছ জি মহািদ্যালয় খেল পথাৰত অনুষ্ঠিত সামৰণি অনুষ্ঠানত স্থান লাভ কৰা দল আৰু প্ৰতিযোগিসকলক বঁটা প্ৰদান কৰা হয় ৷
সামৰণি অনুষ্ঠানত ডিব্ৰুগড় বিশ্ববিদ্যালয়ৰ ক্ৰীড়া সঞ্চালক ড৹ মন্টু বড়ো আৰু মহাবিদ্যালয়ৰ অধ্যক্ষ ড৹ জয়ন্ত গগৈ মুখ্য অতিথি হিচাবে উপস্থিত থাকে। ছাত্ৰ ছাত্ৰী সকলে দেখুৱা দক্ষতাত সন্তোষ প্ৰকাশ কৰি সঞ্চালক ড০ মন্টু বড়োয়ে এই দক্ষতা আৰু নিপুন কৰিব লাগিব বুলি মন্তব্য কৰে ৷
