আগন্তুক পঞ্চায়ত নিৰ্বাচনৰ প্ৰতি লক্ষ্য ৰাখি অসম গণ পৰিষদ দলে নিৰ্বাচনী প্ৰচাৰত উঠি পৰি লাগিছে।কালি গোলাঘাট জিলাৰ খুমটাই বিধান সভা সমষ্টিৰ অন্তৰ্গত ঢেকিয়ালত এখন বিশাল ৰাজহুৱা অভিৱৰ্তন অনুষ্ঠিত কৰে। অভিৱৰ্তন খনত সভাপতিত্ব কৰে গোলাঘাট জিলা সমিতিৰ সভাপতি পৱন শইকীয়া আৰু আঁত ধৰে সম্পাদক আটিকুৰ ৰহমানে। অগপ দলৰ কেন্দ্ৰীয় সভাপতি তথা কৃষি মন্ত্ৰী অতুল বৰা, পঞ্চায়ত নিৰ্বাচন পৰিচালনা সমতিৰ মুখ্য আহ্বায়ক ফণীভূষণ চৌধূৰী, যুৱ পৰিষদৰ সভাপতি সুনীল দত্ত আদিকে ধৰি বহুতো নেতা অভিৱৰ্তন খনত উপস্থিত থাকে। ভাষণ প্ৰসংগত অতুল বৰাই কোনো কাৰণতে নগা চুক্তি মানি নলয় বুলি সভাত স্পষ্ট কৰি দিয়ে। লগতে কয় নাগালিমৰ নামত যদি অসমৰ ভূ খণ্ডত অলপো আঁচোৰ পৰে তেন্তে ইয়াৰ তীব্ৰ বিৰোধিতা কৰা হ’ব বুলি জনসাধাৰণৰ আগত ব্যক্ত কৰে। আনহাতে পঞ্চায়ত নিৰ্বাচন পৰিচালনা সমতিৰ মুখ্য আহ্বায়ক তথা বিধায়ক ফণীভূষণ চৌধূৰীয়ে আগন্তুক পঞ্চায়ত নিৰ্বাচনত অগপ দলে অকলে প্ৰতিদ্বন্দ্বিতা কৰিব বুলি জানিবলৈ দিয়ে।তেওঁ কয় যে পঞ্চায়ত নিৰ্বাচন এখন ছেমি ফাইনেল, গতিকে ২১ত চৰকাৰ দখল কৰিব হ’লে পঞ্চায়ত দখল কৰি ৰাজ্যৰ জনসাধাৰণৰ মনত বিশ্বাস স্থাপন কৰিব লাগিব।সভাত দলে ঐক্যবদ্ধ ভাবে কাম কৰি যোৱাৰ প্ৰতিশ্ৰুতি ল’লে।
