নাগৰিকত্ব সংশোধনী বিধেয়কৰ বিৰুদ্ধে ক্ৰমাৎ প্ৰতিবাদ তীব্ৰ হৈ অহাৰ লগে লগে অসম চৰকাৰ তথা বিজেপিৰ ভাষ্যও মন কৰিবলগীয়া হৈ পৰিছে। নাগৰিকত্ব সংশোধনী বিধেয়কৰ ক্ষেত্ৰত ৩০ জুনৰ পিছতহে চৰকাৰে মতামত প্ৰকাশ কৰিব। বিজেপিয়েও তেতিয়াহে নিজৰ স্থিতিৰ কথা ক’ব। এই ক্ষেত্ৰত চৰকাৰৰ স্থিতিক লৈ প্ৰশ্ন আহিলেই উত্তৰ আহে- ৩০ জুনলৈ অপেক্ষা কৰক। প্ৰথমে মন্ত্ৰী ড০ হিমন্ত বিশ্ব শৰ্মাই নাগৰিকত্ব সংশোধনী বিধেয়ক সন্দৰ্ভত চৰকাৰে ৩০ জুনৰ পিছত মতামত ৰাজহুৱা কৰিব বুলি কৈছিল। তাৰ পিছত মুখ্যমন্ত্ৰী সৰ্বানন্দ সোণোৱালেও ৩০ জুনলৈ অপেক্ষা কৰিবলৈ কৈছে। জাতিধ্বংসী এই বিধেয়কৰ ক্ষেত্ৰত কিয় ৩০ জুনলৈ অপেক্ষা কৰিব লাগে?
চৰকাৰৰ এই স্থিতিয়ে বিভিন্ন মহলত গভীৰ সন্দেহৰ জন্ম দিছে। কাৰণ ৩০ জুনত প্ৰকাশ পাব ৰাষ্ট্ৰীয় নাগৰিক পঞ্জীৰ চূড়ান্ত খচৰা। ৰাষ্ট্ৰীয় নাগৰিক পঞ্জীৰ সৈতে নাগৰিকত্ব সংশোধনী বিধেয়কৰ কি সম্পৰ্ক আছে? তাক লৈ প্ৰশ্ন কৰিছে অসমৰ ৰাইজে। সেই প্ৰশ্ন কৰাৰ অধিকাৰ আছে ৰাজ্যখনৰ জনসাধাৰণৰ।
ৰাষ্ট্ৰীয় নাগৰিক পঞ্জী উন্নীতকৰণ হৈছে অসম চুক্তিৰ আধাৰত। আৰু উচ্চতম ন্যায়ালয়ৰ নিৰ্দেশনা তথা কঠোৰ নিৰীক্ষণত। ৰাষ্ট্ৰীয় নাগৰিক পঞ্জীত অসম চুক্তিৰ মতে ১৯৭১ চনৰ ২৫ মাৰ্চৰ পূৰ্বে অসমলৈ প্ৰব্ৰজন কৰা সকলো লোকৰে নাম অন্তৰ্ভুক্ত হ’ব। সকলো স্তৰৰ লোকৰ পূৰ্ণ সহযোগিতাত নাগৰিক পঞ্জী উন্নীতকৰণ প্ৰক্ৰিয়া চলি আছে। আনহাতে, নাগৰিকত্ব সংশোধনী বিধেয়ক হৈছে আমাৰ দেশৰ সংবিধানৰ পৰিপন্থী। ধৰ্মৰ ভিত্তিত নাগৰিকত্ব প্ৰদান কৰিবলৈ বিচৰা হৈছে এই সংশোধনীৰ জৰিয়তে। যাৰ চূড়ান্ত কু-ফল ভোগ কৰিব লাগিব অসমে। সেইবাবেই অসমত আৰম্ভ হৈছে শক্তিশালী গণ আন্দোলনৰ।
অসমৰ ৰাইজে কোনোপধ্যেই এই নাগৰিকত্ব সংশোধনী বিধেয়ক গ্ৰহণ নকৰে। যুটীয়া সংসদীয় সমিতিয়ে অসমলৈ শুনানি গ্ৰহণ কৰিবলৈ আহোতে কেনেদৰে খিলঞ্জীয়া লোক হিলদ’ল ভাঙি ওলাই আহিছিল তাক সকলোৱে দেখিলে।
বাংলাদেশী হিন্দুক ভাৰত তথা অসমত সংস্থাপন কৰিবলৈ মোদী চৰকাৰে কৰা গভীৰ ষড়যন্ত্ৰৰ বহিঃপ্ৰকাশ ঘটিছে এই সংশোধনী বিধেয়কৰ জৰিয়তে। হিন্দু বাংলাদেশীক নাগৰিকত্ব প্ৰদান কৰি অসমত খিলঞ্জীয়া জনগোষ্ঠীৰ অস্তিত্বৰ প্ৰতি ভাবুকি আনিব বিচাৰিছে বিজেপিয়ে।
বিতৰ্কিত বিধেয়কখনৰ বিৰুদ্ধে হোৱা প্ৰতিবাদৰ ভয়ংকৰ ৰূপ দেখি অন্য কৌশল ৰচনা কৰিছে বিজেপিয়ে।
৩০ জুনত ৰাষ্ট্ৰীয় নাগৰিক পঞ্জীৰ চূড়ান্ত খচৰা প্ৰকাশ হ’লে বহুলোকৰ নাম বাদ পৰিব বুলি নিশ্চিত হৈছে অসম চৰকাৰ তথা বিজেপি। হিন্দু লোকতকৈ মুছলমান লোক অধিক বাদ পৰাৰ আশংকা আছে। তেতিয়াই বিজেপিয়ে আৰম্ভ কৰিব মেৰু বিভাজনৰ ৰাজনীতি। এন আৰ চিত অন্তৰ্ভুক্ত নোহোৱা মুছলমানৰ সংখ্যাধিক্যক লৈ আৰম্ভ কৰিব ৰাজনীতি। সেই সুযোগৰ অপেক্ষাত আছে অসম চৰকাৰ তথা বিজেপি।
এন আৰ চিত নাম বাদ পৰা লোকসকলৰ হৈ মাত মাতিব কংগ্ৰেছ আৰু এ আই ডি ইউ এফে। তেতিয়াই বিজেপিয়ে এনে এক ধাৰণা দিবলৈ বিচাৰিব যে- কংগ্ৰেছে বাংলাদেশৰ পৰা প্ৰব্ৰজন কৰা মুছলমানসকলৰ স্বাৰ্থৰ হৈ কথা কয়। তেওঁলোকক লৈ কংগ্ৰেছে ৰাজনীতি কৰে। এইখিনিতেই এটা দিশ মন কৰিব লাগিব যে- কংগ্ৰেছে এন আৰ চিত নাম বাদ পৰা সংখ্যালঘুৰ হৈ মাত মাতিবই। কাৰণ, নহ’লে এ আই ডি ইউ এফে এই ক্ষেত্ৰত সুযোগ গ্ৰহণ কৰিব। কংগ্ৰেছ নেতৃত্বই সেই সুযোগ কেতিয়াও এ আই ডি ইউ এফক দিবলৈ নিবিচাৰে। তেতিয়া বিজেপিয়ে কংগ্ৰেছ সংখ্যালঘুৰ দল বুলি এক ধাৰণা দিবলৈ চেষ্টা কৰিব। ইয়াৰ জৰিয়তে মেৰু বিভাজনৰ ৰাজনীতি অধিক ত্বৰান্বিত কৰিবলৈ সাজু হৈছে বিজেপি। সাম্প্ৰদায়িক বিভাজন আনি ৰাজ্যখনত ৰাজনৈতিকভাৱে শক্তিশালী হৈ থাকিব বিচাৰিছে গেৰুৱা বাহিনীয়ে। সেইবাবেই তেওঁলোকে অপেক্ষা কৰিছে ৩০ জুনলৈ।
কিন্তু বিজেপি তথা অসম চৰকাৰৰ এই স্থিতিৰ উমান পাই সজাগ হৈ পৰিছে সকলো। কোনো পধ্যেই যাতে সাম্প্ৰদায়িক, বিভাজনকামী শক্তিয়ে অসমত অঘটন ঘটাব নোৱাৰে তাৰবাবে সজাগ থাকিব লাগিব জনসাধাৰণ।
অহা ৩০ জুন হ’ব অসমৰ জাতীয় জীৱনৰ বাবে এক ঐতিহাসিক মুহূৰ্ত। ঐতিহাসিক অসম চুক্তিৰ আধাৰত উন্নীত কৰা নাগৰিক পঞ্জীৰ চূড়ান্ত খচৰা প্ৰকাশ পাব। আৰু সেই ঐতিহাসিক দিনটোৰ পৰাই বিজেপিয়ে আৰম্ভ কৰিব বিচাৰিব বিভাজনৰ ৰাজনীতি। সেইবাবে সকলোৱে এই কথাত সৰৱ হোৱা উচিত যে- নাগৰিক পঞ্জী আৰু নাগৰিকত্ব সংশোধনী বিধেয়ক একাকাৰ কৰিব বিচৰা অসম চৰকাৰ আৰু বিজেপিৰ এই অভিসন্ধি সফল হ’বলৈ দিব নোৱাৰি। গেৰুৱা বাহিনীৰ এই ষড়যন্ত্ৰ কাৰ্যকৰী হ’বলৈ হ’লে ভয়ংকৰ পৰিস্থিতিৰ উদ্ভৱ হ’ব। তাৰ বিৰুদ্ধে গণতান্ত্ৰিক, ধৰ্ম নিৰপেক্ষ শিবিৰ মাৰবান্ধি থিয় হ’ব লাগিব।
(লেখক এজন জ্যেষ্ঠ সাংবাদিক। তেখেতৰ ই মে’ইল ঠিকনা : bora.bhaskarjyoti@yahoo.com)
