উত্তৰ-পূব তথা অসমৰ যুৱক যুৱতী বিভিন্ন সময়ত বহি:ৰাজ্যত নিৰ্যাতন তথা হত্যাৰ বলি হোৱা প্ৰায়ে দেখা যায়। ঠিক সেইদৰে কালিও এনেকুৱা ঘটনা সংঘটিত হ’ল কেৰেলাত। অসমৰ বিলাসীপাৰাৰ মেধিপাৰাৰ শৰৎ চন্দ্ৰ ৰায়ৰ পুত্ৰ সহদেৱ ৰায় নামৰ যুৱকজনৰ মৃতদেহ উদ্ধাৰে চাঞ্চল্যৰ সৃষ্টি কৰিছে অঞ্চলবাসীৰ লগতে কৰ্মৰত স্থানত। সোমবাৰে নিশা কোনো দুৰ্বৃত্তই চোকা অস্ত্ৰৰে ডিঙি ৰিপি হত্যা কৰে এই যুৱকজনক। পৰিয়ালক এই হত্যাকাণ্ডৰ বিষয়ে মঙলবাৰে ৰাতিপুৱা খবৰ দিয়ে। মৃত্যুৰ খবৰ লাভ কৰাৰ লগে লগে অতি দুখীয়া পৰিয়ালটোৰ মাজত হাহাকাৰ পৰিস্থিতিৰ সৃস্থি হয়। সহদেৱ ৰায়ৰ অকাল মৃত্যুত অঞ্চলবাসীৰ মাজত শোকাকুল পৰিৱেশে বিৰাজ কৰিছে।
উল্লেখযোগ্য যে সহদেৱ ৰায় ছমাহ পূৰ্বে কৰ্মৰ সন্ধানত বহি:ৰাজ্য কেৰেলালৈ গৈছিল। আৰু কেৰেলাৰ কান্নুৰ জিলাৰ এৰিকুৰ অঞ্চলৰ এটা পাথ্থৰ কুৱেৰিত শ্ৰমিক হিচাপে কাম কৰি আছিল। কিন্তু কালি নিজৰ শোৱাপাটীতে তেজেৰে লুতুৰি-পুতুৰি অৱস্থাত ৰায়ৰ মৃতদেহ স্থানীয় লোকে উদ্ধাৰ কৰি আৰক্ষী তথা ঘৰত খবৰ দিয়ে। পৰিয়ালৰ লোকে এই দুখবৰ লাভ কৰাৰ পিছত ঘটনা সন্দৰ্ভত সাপটগ্ৰাম থানাত এখন এজাহাৰ দাখিল কৰে। কিন্তু কোনে কি কাৰণত হত্যা কৰে সেয়া এতিয়াও ৰহস্যৰ আৱৰ্তত।
আনহাতে কৰেলাত সংঘটিত হোৱা হত্যা সন্দৰ্ভত আক্ৰাছুৱে দুখ প্ৰকাশ কৰাৰ উপৰি বহিঃৰাজ্যত অসমৰ যুৱক-যুৱতিৰ নিৰাপত্তা নিশ্চিত কৰিবলৈ চৰকাৰৰ ওচৰত দাবী জনায়। অতি দুখীয়া পৰিয়ালৰ যুৱকজনৰ মৃতদেহটো কেৰেলাৰ পৰা অনাৰ ব্যৱস্থা কৰি দিয়া তথা দুৰ্ভগীয়া পৰিয়ালটোক এককালীন সাহায্য প্ৰদান কৰাৰ বাবে আক্ৰাছুৱে চৰকাৰক আহ্বান জনায়।
