দৰং জিলা হেল্থ ছ’চাইটিৰ উদ্যোগত আজি মঙলদৈত দিনজোৰা কাৰ্যসূচীৰে ‘বিশ্ব ৰক্ত দান’ দিৱস পালন কৰা হয়। এই দিৱসৰ লগত সংগতি ৰাখি সজাগতামূলক সমদল, ৰক্ত দাতাসকলক সম্বৰ্ধনা, চেমিনাৰৰ লগতে ৰক্ত দান শিবিৰৰো আয়োজন কৰে।
আনহাতে এই দিৱসৰ লগত সংগতি ৰাখি মঙলদৈ অসামৰিক চিকিৎসালয় চৌহদত বিভিন্ন লোকৰ উপস্থিতিত এখন ৰাজহুৱা সভাও অনুষ্ঠিত কৰে। সভাত বিভিন্ন বেচৰকাৰী সংস্থা ক্ৰমে ‘ক্ৰিষ্টেল ভিজন’ৰ শেখৰ মজুমদাৰ, ‘হিউমেনিটি’ৰ নিত্যানন্দ গোস্বামী আৰু দীপক দাস আৰু নিতিশ কুমাৰ দেৱে সমাজলৈ আগবঢ়োৱা অনবদ্য অৱদানৰ বাবে তেওঁলোকক সম্বৰ্ধনা জনোৱা হয়।
ডাঃ যদুমনি কাকতিৰ সভাপতিত্বত অনুষ্ঠিত হোৱা সভাত কাকতিয়ে নৱেল পুৰষ্কাৰ বিজয়ী বিজ্ঞানী ডাঃ কাৰ্ল লেণ্ডষ্টেইনৰ জন্মদিনৰ দিনা বিশ্ববাসীয়ে উদযাপন কৰি অহা ‘বিশ্ব ৰক্ত দান’ দিৱসৰ গুৰুত্ব তথা তাৎপৰ্যৰ বিষয়ে মন্তব্য কৰে। ইয়াৰ উপৰি এই সভাত ডাঃ ৰমেশ চন্দ্ৰ গোস্বামী, ডাঃ প্ৰশান্ত গোস্বামীৰ লগতে বহুতো ব্যক্তিয়ে ভাষণ প্ৰদান কৰে।
আনহাতে এই অনুষ্ঠানৰ পাচতে মঙলদৈ চিকিৎসালয়ৰ ব্লাড বেংকত ‘ক্ৰিষ্টেল’ আৰু ‘হিউমেনিটি’ৰ বিভিন্ন সদস্যসকল তথা ৰাষ্ট্ৰীয় নাট্য বিদ্যালয়ৰ পৰা প্ৰশিক্ষিত যুৱ অভিনেতা মৃগেন্দ্ৰ কোঁৱৰ আৰু ভ্ৰাম্যমাণ জগতৰ সুদক্ষ অভিনেতা দীপজ্যোতি নাথে ৰক্ত দান কৰে। চিকিৎসালয়ৰ ব্লাড বেংকত যাতে কোনো দিনে তেজৰ নাটনি নহয় তাৰ বাবে অভিনেতা দুগৰাকীয়ে সকলো যুৱ প্ৰজন্মকে মাজে সময়ে ৰক্ত দান কাৰ্যসূচীত অংশ ল’বলৈ আহ্বান জনায়।
উল্লেখ্য যে দিনটোৰ আৰম্ভণিতে দৰং জিলা হেল্থ ছ’চাইটিৰ উদ্যোগত জিলাখনৰ আশা কৰ্মী, স্বাস্থ্য কৰ্মী, নাৰ্ছৰ লগতে বিভিন্ন লোকৰ উপস্থিতিত মঙলদৈ চহৰত এটা সজাগতা মূলক সমদল বাহিৰ কৰা হয়।
মন কৰিবলগীয়া যে মঙলদৈ মহাবিদ্যালয়ৰ শিক্ষক তথা ক্ৰিষ্টেল ভিজনৰ উপদেষ্টা হৰিমন ডেকা আৰু খাৰুপেটিয়াৰ মাৰোৱাৰি যুৱ মঞ্চৰ পৱন শৰ্মাই অভিলেখ সংখ্যক ৬১ বাৰ ৰক্ত দান কৰি দৰং জিলালৈ গৌৰৱ কঢ়িয়াই আনিছে।
