অসমৰ পৰা যোৱা ছাত্ৰ-ছাত্ৰীৰ চাৰিটা সাংস্কৃতিক দলে জানুৱাৰিৰ ৩ তাৰিখৰ পৰা ৬ তাৰিখলৈ মধ্যপ্ৰদেশৰ ভূপালত অনুষ্ঠিত ৰাষ্ট্ৰীয় পৰ্যায়ৰ কলা উৎসৱত অংশগ্ৰহণ কৰি ৰাজ্যখনলৈ গৌৰৱ কঢ়িয়াই আনিছে।
যোৰহাটৰ পৰা যোৱা দলটোৱে সংগীতত প্ৰথম স্থান লাভ কৰিছে। শিৱসাগৰৰ পৰা যোৱা দলটোৱে নৃত্য প্ৰতিযোগিতাত দ্বিতীয় স্থান লাভ কৰিছে আৰু কামৰূপ মহানগৰ জিলাৰ দলটোৱে নাট প্ৰতিযোগিতাত দ্বিতীয় স্থান লাভ কৰিছে।
মানৱ সম্পদ উন্নয়ন মন্ত্ৰালয়ৰ উদ্যোগত অনুষ্ঠিত কলা উৎসৱটো দেশৰ স্কুলীয়া ছাত্ৰ-ছাত্ৰী আৰু উচ্চতৰ মাধ্যমিক পৰ্যায়ৰ ছাত্ৰ-ছাত্ৰীৰ প্ৰতিভা প্ৰকাশৰ এক মঞ্চ হিচাপে আয়োজন কৰা হৈছিল।
কলা উৎসৱত মাধ্যমিক পৰ্যায়ৰ ছাত্ৰ-ছাত্ৰীৰ মাজত চাৰিটা শাখাত প্ৰতিযোগিতাসমূহ অনুষ্ঠিত হৈছিল। সেইবোৰ হৈছে-সংগীত, নৃত্য, নাটক আৰু দৃশ্য কলা।
জিলা পৰ্যায়ৰ শ্ৰেষ্ঠ দলটোক ৰাজ্যিক পৰ্যায়ত অংশগ্ৰহণৰ বাবে নিৰ্বাচিত কৰা হৈছিল। ৰাজ্যিক পৰ্যায়ৰ কলা উৎসৱৰ শ্ৰেষ্ঠ দলক ৰাষ্ট্ৰীয় পৰ্যায়ৰ কলা উৎসৱত অংশগ্ৰহণৰ বাবে প্ৰেৰণ কৰা হয়।
