পৰিৱৰ্তনৰ স্বপ্ন দেখুওৱা সোণোৱাল চৰকাৰৰ দুটা বছৰ পাৰ হোৱাৰ পিছতো বিহালীৰ টেলেঙনীয়া অঞ্চলৰ স্থানীয় ৰাইজে দীৰ্ঘদিনৰ পৰা এখন দলঙৰ সমস্যাত ভূগিব লগা হোৱাৰ উপৰি অঞ্চলটোত নাই উন্নত যাতায়াত ব্যৱস্থা।
উল্লেখযোগ্য যে বৰ্তমান যমৰ যন্ত্ৰণাত ভূগিব লগা হৈছে কেবিনেট মন্ত্ৰী ৰঞ্জিত দত্তৰ গৃহ সমষ্টিৰ বিহালীৰ টেলেঙনীয়াবাসীয়ে। পৰিৱৰ্তনৰ সপোন দেখুওৱা চৰকাৰৰ এগৰাকী প্ৰভাৱশালী বিধায়ক তথা কেবিনেট মন্ত্ৰী ৰঞ্জিত দত্তৰ নিজ বাসগৃহৰ কাষতে থকা বাঁহৰ দলংখন বৰ্তমানলৈকে উন্নত কৰিব নোৱাৰাত স্থানীয় ৰাইজে ক্ষোভ প্ৰকাশ কৰিছে। আনকি স্থানীয় ৰাইজে বহুবাৰ আবেদন-নিবেদন কৰিও কোনো সুফল নাপালে।
আনহাতে এই অঞ্চলৰ বাট-পথ এজাক বৰষুণ দিলে পথাৰ সদৃশ হয়। স্থানীয় ৰাইজে কৰা অভিযোগ অনুসৰি এই জৰাজীৰ্ণ পথটিৰ বাবে আবণ্টিত ৪,৮৪,৫০০ টকাৰে বিজেপিৰ একাংশ দালালে পথটিৰ নিৰ্মাণকাৰ্য আধাতে সামৰি আবণ্টিত ধন আত্মসাৎ কৰি পথটিৰ আজিলৈও নিৰ্মাণকাৰ্য সম্পূৰ্ণ নকৰিলে।
আনকি পথটিৰ জৰাজীৰ্ণ ৰূপৰ বাবে বহু কেইটা দুৰ্ঘটনাও সংঘটিত হৈছে।
