চৰকাৰে লটাৰী ব্যৱস্থাটোক নিয়ন্ত্ৰিত তথা সুশৃংখলিত কৰিব পৰিলে ইয়ে কৰ্মসংস্থাপন সৃষ্টিৰ বাট মুকলি কৰাৰ সম্ভাৱনা আছে বুলি প্ৰকাশ কৰিছে এগৰাকী লটাৰী বিতৰকে।
উল্লেখযোগ্য যে আগশাৰীৰ সংবাদ প্ৰতিষ্ঠান টাইমছ অৱ ইণ্ডিয়াৰ প্ৰতিবেদন অনুসৰি উত্তৰ- পূবৰ অৰুণাচল প্ৰদেশ, মিজোৰাম আৰু ছিকিমত লটাৰী বৈধ। তদুপৰি গোৱা, কেৰালা, মহাৰাষ্ট্ৰ, পশ্চিমবংগ আৰু পঞ্জাৱতো লটাৰীক বৈধতা প্ৰদান কৰিছে চৰকাৰে।
এই সন্দৰ্ভত ৰাজ্যিক লটাৰী বিতৰকৰ চিইঅ’ কমলেশ বিজয়ে কয়— ‘ভাৰতত লটাৰীয়ে বছৰি ৩৫,০০০ কোটিৰ পৰা ৫০,০০০ কোটিলৈ বৰঙণি যোগাব পাৰে। আনহাতে যদিহে লটাৰী টিকট বিক্ৰী প্ৰক্ৰিয়াটোক সুব্যৱস্থিত কৰিব পাৰি তেন্তে ইয়াৰ জৰিয়তে প্ৰায় ১০ লাখ কৰ্মসংস্থাপন সৃস্টি সম্ভৱ হ’ব।‘
তেওঁ লগতে মাৰ্কিন যুক্তৰাষ্ট্ৰ, ব্ৰিটেইন আৰু চীনৰ উদাহৰণ দাঙি ধৰি কয় যে উক্ত উন্নত দেশসমূহৰ দৰে লটাৰীৰ জৰিয়তে জমা হোৱা ধন আমাৰ দেশতো বিভিন্ন ৰাজহুৱা কল্যানকামী আঁচনিসমূহৰ উন্নয়নৰ বাবে ব্যৱহাৰ কৰিব পৰা যায়। ইয়ে দেশৰ বিকাশত এক গুৰুত্বপূৰ্ণ অৰিহণা যোগাব পাৰে।
যি সময়ত লটাৰীৰ বিৰুদ্ধে গণমত গঢ়ি তোলাৰ বাবে বিভিন্ন সংস্থাই দাবী জনাই আহিছে তেনে সময়তে লটাৰীৰ জৰিয়তে কৰ্মসংস্থাপন সৃষ্টি হ’ব বুলি এগৰাকী বিতৰকে প্ৰকাশ কৰা মন্তব্য যথেষ্ট তাৎপৰ্যপূৰ্ণ।
