২০২০ চনৰ ভিতৰত অতি কমেও ৫ কোটি দুচকীয়া ইলেক্ট্ৰনিক বাহন মুকলি কৰাৰ উদ্দেশ্যে কালি সন্ধিয়া মহানগৰীৰৰ হোটেল হৰ্নবিলত নেচনেল টানৱাল ই ভেৰিকেলে বিভিন্ন আৰ্হিৰ ইলেক্ট্ৰিক দুচকীয়া বাহনৰ শুভাৰম্ভ কৰে। এই ইলেক্ট্ৰিক মটৰচাইকেলৰ শুভাৰম্ভণি কৰে টানৱাল ই ভেৰিকেলৰ পৰিচালক অমিত কুমাৰ মালিয়ে।
এই প্ৰচেষ্টাৰ আঁৰৰ ব্যক্তি চৈফুল ইছলাম কাজিয়ে এক সংবাদমেলৰ জৰিয়তে জানিবলৈ দিয়া অনুসৰি তেওঁলোকে এই প্ৰচেষ্টাৰ জিৰয়তে ৮০ শতাংশ পৰ্যন্ত ফচিল ইন্ধনৰ ব্যৱহাৰ হ্ৰাস কৰিব। ভাৰতৰ অংগ হিচাপে উত্তৰ পূৰ্বাঞ্চলক সেউজীয়া কৰি ৰখাতো সকলোৰে দায়িত্ব। সেয়েহে ২০২০ চনলৈ ইলেক্ট্ৰনিক ম’বিলিটি মিছনৰ দ্বাৰা প্ৰায় এক মিলিয়ন টন ইন্ধন (যাৰ মূল্য প্ৰায় ১০০০ কোটি)ৰ ৰাহি কৰিবলৈ এই ইলেক্ট্ৰনিক বাহনৰ মুকলি কৰা হৈছে বুলি চৈফুল ইছলাম কাজিয়ে জানিবলৈ দিয়ে। লগতে তেওঁ সংবাদমাধ্যমক উল্লেখ কৰা অনুসৰি এই বাহন চলাবলৈ কোনো ধৰণৰ বাহন অনুজ্ঞাপত্ৰৰ প্ৰয়োজন নহয়।
এই বাহন সমূহ সম্পূৰ্ণ প্ৰদূষণমুক্ত আৰু কোনো ধৰণৰ পঞ্জীয়নৰ প্ৰয়োজন নাই। জানিব পৰা মতে অটমেটিভ ৰিচাৰ্ছ এছ’চিয়েচন অব ইণ্ডিয়াই এই দুচকীয়া বাহন সমূহক ৰোড পাৰ্মিছন প্ৰদান কৰিছে।
