ৰাজ্যৰ প্ৰকৃত ছবিৰ পৰিৱৰ্তে দল আৰু চৰকাৰৰ মিছা প্ৰশংসাৰে উপচি পৰিল খানাপাৰাত আজি আয়োজিত অসম বিজেপিৰ বুথ সভাপতি সকলৰ সন্মিলন। ৰাজ্যত শেহতীয়াকৈ কেইবাটাও ধৰ্ষণৰ ঘটনাই সকলোৰে মনস্তত্ত্বক জোকাৰি যোৱাৰ সময়তে, তথা অন্যান্য সমস্যাই ৰাজ্যবাসীক জুৰুলা কৰি থকাৰ সময়তে দৃষ্টিকটুভাৱে সকলো ব্যস্ত হ’ল চৰকাৰৰ গুণ-গান কৰাত।
আজিৰ সভাত উপস্থিত থকা প্ৰায়সকল নেতাকে দেখা গ’ল এই গুণানুকীৰ্তনত। ৰাষ্ট্ৰীয় সমিতিৰ সাধাৰণ সম্পাদক ৰাম মাধৱে নিজৰ বক্তব্যত কয়, ‘পূৰ্বতে নিৰ্বাচনী জনসভা অনুষ্ঠিত কৰিবলৈ খানাপাৰা পশু চিকিৎসালয় খেলপথাৰখন ল’বৰ বাবে বিজেপিক বাদ কৰি অন্য কোনো ৰাজনৈতিক দল সমৰ্থ হোৱা নাছিল। কিন্তু আজিৰ এই অনুষ্ঠান কোনো দলীয় নিৰ্বাচনী প্ৰচাৰৰ সভা নহয়, তথাপি এই সভাত ৩০-৪০ হাজাৰ জনতা দেখি আমি বিস্ময় মানিছো। ইয়াৰ পৰা এটা কথাই প্ৰমাণিত হয় যে ভাৰতীয় জনতা পাৰ্টীয়ে দেশর সমগ্ৰ অঞ্চলতে এক ব্যাপক ৰূপ লৈছে।’
সভাত এখন আন্তঃৰাষ্ট্ৰীয় পৰ্য্যায়ৰ আলোচনীৰ প্ৰসংগ টানি আনি কয় ৰাম মাধৱে আৰু কয়, ‘ ব্লুম্বাৰ নামৰ আলোচনীখনত প্ৰকাশ পোৱা এটি প্ৰবন্ধত উল্লেখ আছে যে ২০১৯ চনতো পাৰ হ’বই, ২০২৪ চনলৈকে মোদী নেতৃত্বাধীন বিজেপিয়ে শাসনভাৰ অনায়াসে চলাই নিব।‘ আনহাতে, তেওঁ দেশৰ ২১ খন ৰাজ্যতে বিজেপিৰ শাসন চলি থকা বুলি মন্তব্য কৰে।
ইয়াৰোপৰি তেওঁ অভিনেতা অমিতাভ বচ্চনে অভিনয় কৰা এখন চলচ্চিত্ৰৰ উদ্ধৃতি দি কয়, ‘ সেই চলচ্চিত্ৰখনত হিৰ’ অমিতাভ বচ্চনক ভিলেইনজনে কৈছিল যে মোৰ পিছত ধন-সম্পত্তি, ক্ষমতা সকলো আছে কিন্তু তোমাৰ হাতত কি আছে? তাৰ উত্তৰত অমিতাভ বচ্চনে কৈছিল, তোমাৰ পাছত সকলো থাকিলেও লাভ নাই, মোৰ সৈতে মোৰ মা আছে। ঠিক তেনেকৈয়ে আমাৰ সৈতে ভাৰত মাতা আছে আৰু মোদীজী আছে। বেলেগ ৰাজনৈতিক দলৰ প্ৰচুৰ পৰিমাণৰ ধন-সম্পত্তি থাকিলেও লাভ নাই, কাৰণ বিজেপিৰ হাতত বহুখিনি কাৰ্য্যকৰ্তাৰ কঠোৰ পৰিশ্ৰম জড়িত হৈ আছে।‘
আনহাতে, সাধাৰণ সম্পাদকগৰাকীয়ে আৰ এছ এছৰ ভাষাত প্ৰধান মন্ত্ৰী নৰেন্দ্ৰ মোদী আৰু অমিত শ্বাহক দেৱ দুৰ্লভ কাৰ্য্যকৰ্তা বুলি অভিহিত কৰে।
ইয়াৰোপৰি তেওঁ ভাষণৰ শেষৰ ফালে চৰকাৰে হাতত লোৱা আঁচনিসমূহ গাঁৱলীয়া অঞ্চলৰ লোকসকলে লাভ কৰিব পাৰিছেনে নাই সেই কথাত দৃষ্টি ৰাখিবৰ বাবে আহ্বান জনায়।
উক্ত বুথ সন্মিলনতে অংশগ্ৰহণ কৰি বিজেপিৰ ৰাষ্ট্ৰীয় সাংগঠনিক সম্পাদক ৰামলালে ভাষণ প্ৰদান কৰি কয়, ‘মই অসমৰ বুথ কাৰ্য্যকৰ্তাসকলক ধন্যবাদ জনাব বিচাৰো। কাৰণ তেওঁলোকে অতি কম সময়ৰ ভিতৰত অশেষ কষ্ট স্বীকাৰ কৰি নতুনকৈ বুথসমূহ নিৰ্মাণ কৰিছে। অসমৰ বিজেপিৰ দ্ৰুতগতিত উত্থান হোৱাৰ ফলত এতিয়া অন্য ৰাজ্যৰ বিজেপিৰ লোকসকলে তেওঁলোকৰ সাংগঠনিক ভেটি শক্তিশালী কৰিবলৈ অসমৰ পৰা আৰ্হি লৈছে।‘
তদুপৰি তেওঁ বুথৰ সভাপতিসকলক আহ্বান জনাই কয় ‘বুথ জিতা তৌ সুনাব জিতা। যদি বুথত জয় লাভ কৰিব বিচাৰে তেন্তে প্ৰথমে প্ৰত্যেকে নিজৰ নিজৰ বুথসমূহ শক্তিশালী ৰূপত গঢ় দিব লাগিব।
আনহাতে, তেওঁ প্ৰধান মন্ত্ৰীৰ মন কি বাত অনুষ্ঠানটো শুনিবৰ বাবে প্ৰত্যেক বুথৰে লোকসকলক আগ্ৰহী কৰি তুলিবলৈ আহ্বান জনায়।
উক্ত সভাত উপস্থিত থকা অসমৰ মুখ্য মন্ত্ৰী সৰ্বানন্দ সোণোৱালে ভাষণ প্ৰদান কৰি কয়, ‘মই বিশ্বাস ৰাখিছো ৰাজ্যৰ প্ৰতিগৰাকী ভাৰতীয় জনতা পাৰ্টীৰ কৰ্মকৰ্তাই আগন্তুক দিনত অসমৰ ৩ কোটি ৩০ লাখ মানুহৰ হৃদয় জয় কৰিবলৈ সক্ষম হ’ব। পূৰ্বৰ নিৰ্বাচনসমূহত ৰ’দ-বতাহ বৰষুণকো নেওচি আপোনাসবে প্ৰতিঘৰ মানুহৰ ঘৰলৈ গৈ নিৰ্বাচনী প্ৰচাৰ চলাইছিল তাৰ বাবে মই আপোনাসবক কৃতজ্ঞতা জ্ঞাপন কৰিছো।’
লগতে তেওঁ কয় ‘পঞ্চায়তীৰাজ ব্যৱস্থা স্বচ্ছ হ’লেহে গ্ৰাম্য অঞ্চলৰ অৰ্থনীতি শক্তিশালী হ’ব। বিগত কংগ্ৰেছ চৰকাৰখনে পঞ্চায়তীৰাজ ব্যৱস্থাত সম্পূৰ্ণৰূপে কালিমা সানিলে। তেওঁলোকৰ দুৰ্নীতি ভ্ৰষ্টাচাৰে গাঁৱলীয়া লোকসকলক প্ৰাপ্য অধিকাৰৰ পৰা বঞ্চিত কৰিলে।
আনহাতে, মুখ্য মন্ত্ৰীগৰাকীক বিধানসভাৰ নিৰ্বাচনৰ পূৰ্বে দিয়া দুৰ্নীতিমুক্ত অসম, সন্ত্ৰাসবাদমুক্ত অসম, বিদেশী মুক্ত অসম, প্ৰদূষণমুক্ত অসম , এই চাৰিওটা মূল মন্ত্ৰৰ কথা দোহৰা দেখিবলৈ পোৱা গ’ল।
উল্লেখনীয় অসমতে সঘনে হ’বলৈ ধৰা ধৰ্ষণ, নাৰী নিৰ্যাতন, হত্যা, ডকাইতিৰ ঘটনাবোৰক আওকাণ কৰি তথা মূল্যবৃদ্ধিত সৰ্বসাধাৰণ লোকসকল জুৰুলা হোৱাৰ বিপৰীতে ৰাজ্যিক কেন্দ্ৰীয় মন্ত্ৰী ৰাজেন গোহাঁয়ে দাম্ভিকতাৰে কয়, ‘প্ৰধান মন্ত্ৰী নৰেন্দ্ৰ মোদী শাসনলৈ অহাৰ ৪টা বছৰৰ ভিতৰত দেশৰ চৌদিশে শান্তিয়ে বিৰাজ কৰিছে। কোনো অঞ্চলতে বোমা বিস্ফোৰণ বৰ্তমানলৈকে হোৱা নাই। কোনো সন্ত্ৰাসবাদীয়ে সন্ত্ৰাস সৃষ্টি কৰা নাই। পূৰ্বৰ তুলনাত মূল্যবৃদ্ধি ৰোধ কৰা হৈছে। উত্তৰ-পূৰ্বাঞ্চলৰ প্ৰতি কেন্দ্ৰৰ বিজেপি চৰকাৰখনে যিধৰণে গুৰুত্ব দিছে অন্য কোনো চৰকাৰে গুৰুত্ব দিয়াৰ কথা ইতিহাসতে উল্লেখ নাই।’
সেই সভাখনত সভাপতিৰ দ্বায়িত্বত থকা ৰাজ্যিক বিজেপিৰ সভাপতি ৰঞ্জিত দাসে পূৰ্বৰ বক্তাসকলৰ সৈতে সুৰ মিলাই একেখিনি কথাকে দোহাৰে।
লক্ষণীয়ভাৱে বিজেপিৰ কেন্দ্ৰীয় নেতৃবৰ্গ, ৰাজ্যিক নেতৃবৰ্গৰ বক্তৃতাত অসমৰ বৰ্তমান পৰিস্থিতিৰ জ্বলন্ত সমস্যাবোৰ তথা ৰাজ্যজুৰি নাবালিকা, কিশোৰী ধৰ্ষণৰ শেহতীয়া ঘটনাবোৰ, নাৰী নিৰ্য্যাতনৰ প্ৰসংগ আদিয়ে স্থান নাপালে। তাৰ পৰিৱৰ্তে প্ৰত্যেকগৰাকী বক্তাক দেখা গ’ল চৰকাৰ আৰু দলৰ গুণানুকীৰ্তন কৰা।
