ৰাজ্যৰ জিমনাষ্টিক জগতখনলৈ আনন্দৰ বতৰা কঢ়িয়াই আনিছে গুৱাহাটীৰ উপাসা তালুকদাৰে। উপাসাই সদ্য সমাপ্ত ২৪ সংখ্যক ছাব-জুনিয়ৰ আৰু জুনিয়ৰ ৰিডমিক জিমনাষ্টিক প্ৰতিযোগিতাত স্বৰ্ণ পদক জয় কৰি ৰাজ্যবাসীক গোৰৱাণ্বিত কৰিবলৈ সক্ষম হয়।
পঞ্জাব জিমনাষ্টিক সন্থাৰ উদ্যোগত ম’হালীত অনুষ্ঠিত উক্ত প্ৰতিযোগিতাত প্ৰতিভাশালী জিমনাষ্ট উপাসাই ১০ বছৰ বয়সৰ ফ্ৰী হেণ্ড ৰুটিন শাখাত সৰ্বাধিক ১০.৪৫ পইণ্ট সংগ্ৰহ কৰি স্বৰ্ণ পদকটো লাভ কৰে।
উল্লেখ্য যে ইয়াৰ পূৰ্বে ২৭ৰ পৰা ৩১ মাৰ্চলৈ গোৱালিয়ৰৰ এল এন আই পি ইত প্ৰথমবাৰৰ বাবে আয়োজিত প্ৰ’ এম জিমনাষ্টিক লীগত এটা স্বৰ্ণ পদকৰ লগতে দুটা ৰূপৰ পদক অৰ্জন কৰিবলৈ সক্ষম হৈছিল উপাসাই।
গুৱাহাটী বৰসজাইস্থিত মহৰ্ষি বিদ্যামন্দিৰৰ চতুৰ্থ শ্ৰেণীৰ ছাত্ৰী উপাসা তালুকদাৰে প্ৰ’ এম লীগত সৰ্বাধিক জনপ্ৰিয় জিমনাষ্ট হিচাপেও বিবেচিত হয়।
স্মৰ্তব্য যে, ৰিঅ’ অলিম্পিকত ত্ৰিপুৰাৰ জিমনাষ্ট দীপা কৰ্মকাৰে সুন্দৰ প্ৰদৰ্শন আগবঢ়োৱাৰ পাছত উপাসাৰ সফলতাই ৰাজ্যৰ জিমনাষ্টিক ক্ষেত্ৰখনলৈ আন এক প্ৰতিশ্ৰুতি কঢ়িয়াই আনিছে।
