অচ্যুত কুমাৰ পাটোৱাৰীলৈ ৰমেশ চন্দ্ৰ নাথ সোঁৱৰণী সাংবাদিকতা বঁটা
চলিত বৰ্ষত ৰমেশ চন্দ্ৰ নাথ সোঁৱৰণী সাংবাদিকতা বঁটা প্ৰদান কৰা হ’ব ৰাজ্যৰ বিশিষ্ট সাংবাদিক অচ্যুত কুমাৰ পাটোৱাৰীক।
উল্লেখযোগ্য যে উত্তৰ গুৱাহাটী জাৰ্নেলিষ্ট ফ’ৰামে নাৰায়ণা ছুপাৰস্পেচিয়েলিটি হাস্পতালৰ সহযোগত যোৱা চাৰি বছৰে অসমৰ সংবাদ জগতলৈ গুৰুত্বপূৰ্ণ অৰিহণা আগবঢ়াই অহা একো একোজন জ্যেষ্ঠ সাংবাদিকক ৰমেশ চন্দ্ৰ নাথ সোঁৱৰণী সাংবাদিকতা বটাঁ প্ৰদান কৰি আহিছে।
চলিত বৰ্ষৰ বাবে এই সাংবাদিকতা বঁটা অসমৰ সংবাদ জগতলৈ গুৰুত্বপূৰ্ণ অৰিহণা আগবঢ়াই অহা ‘অসমীয়া প্ৰতিদিন’ কাকতৰ মুখ্য সহযোগী সম্পাদক অচ্যুত কুমাৰ পাটোৱাৰীক প্ৰদান কৰাৰ বাবে সিদ্ধান্ত গ্ৰহণ কৰিছে উদ্যোক্তাসকলে।
প্ৰসংগক্ৰমে উল্লেখযোগ্য যে অহা ২৬ এপ্ৰিল, বৃহস্পতিবাৰে দিনৰ ১১ বজাত গুৱাহাটী প্ৰেছ ক্লাবত এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰা হ’ব ৰাজ্যৰ জ্যেষ্ঠ সাংবাদিকগৰাকীক। বঁটা প্ৰদান কৰিব আউনীআটী সত্ৰৰ সত্ৰাধিকাৰ, বিশিষ্ট সাহিত্যিক ড০ পীতাম্বৰ দেৱগোস্বামীয়ে।
আনহাতে উত্তৰ গুৱাহাটী জাৰ্নেলিষ্ট ফ’ৰামে জগত চন্দ্ৰ গগৈৰ সোঁৱৰণত ২০১৮ বৰ্ষৰ বাবে আছাম টক্ছ চেনেলৰ কাৰ্যবাহী সম্পাদক ঋতুস্মিন শৰ্মাক সম্বৰ্ধনা জ্ঞাপন কৰিব।
উক্ত বঁটা প্ৰদান অনুষ্ঠানতে উত্তৰ গুৱাহাটী জাৰ্নেলিষ্ট ফ’ৰামৰ উদ্যোগত প্ৰকাশ পাবলগীয়া তিনিমহীয়া বাতৰি কাকত ‘বৰ অসম বাৰ্তা’ উন্মোচন কৰা হ’ব বুলি প্ৰকাশ কৰিছে উদ্যোক্তা সকলে।