অসমৰ ক্ৰিকে’টপ্ৰেমীলৈ সুখবৰ, গুৱাহাটীত ভাৰত-ৱেষ্ট ইণ্ডিজৰ মাজত আন্তঃৰাষ্ট্ৰীয় এদিনীয়া
অসমৰ ক্ৰিকে’টপ্ৰেমীৰ বাবে সুখবৰ। চলিত বছৰৰ ২৭ অক্টোবৰত গুৱাহাটীত অনুষ্ঠিত হ’ব ভাৰত আৰু ৱেষ্ট ইণ্ডিজৰ মাজত আন্তঃৰাষ্ট্ৰীয় এদিনীয়া।
মহানগৰ আৰক্ষী আয়ুক্ত হীৰেন নাথৰ লগতে উপায়ুক্ত বীৰেন্দ্ৰ মিট্টালে আজি ২০ এপ্ৰিলত পৰ্যবেক্ষণ কৰিলে খেলখন অনুষ্ঠিত হ’ব লগা গুৱাহাটীৰ বৰ্ষাপাৰা ষ্টেডিয়াম।
অক্টোবৰত ভাৰত ভ্ৰমণলৈ আহিব লগা ৱেষ্ট ইণ্ডিজ দলে ভাৰতীয় দলৰ সৈতে ৩ খন টেষ্ট, ৫ খন এদিনীয়া আৰু এখন ২০-২০ খেল খেলিব।
গুৱাহাটীত পুনৰ এখন আন্তঃৰাষ্ট্ৰীয় ক্ৰিকে’ট খেলৰ আয়োজনে অসমৰ ক্ৰিকে’টপ্ৰেমীলৈ আনন্দ কঢ়িয়াই আনিছে। উল্লেখযোগ্য যে যোৱা বছৰ ১১ অক্টোবৰত ভাৰত আৰু অষ্ট্ৰেলিয়াৰ মাজৰ খেলখনৰ পিছত খেলপথাৰৰ পৰা ঘূৰি অহা অষ্ট্ৰেলিয়া দলৰ বাছলৈ শিল দলিউৱা ঘটনাটোৰ পিছত গুৱাহাটীত আন্তঃৰাষ্ট্ৰীয় ক্ৰিকে’ট অনুষ্ঠিত হোৱাৰ ক্ষেত্ৰত এক অনিশ্চয়তা আহি পৰিছিল।