কেন্দ্ৰ আৰু ৰাজ্যৰ বিজেপি নেতৃত্বাধীন চৰকাৰে নাগৰিকত্ব সংশোধনী বিধেয়ক-২০১৬ ৰ জৰিয়তে অবৈধ হিন্দু বাংলাদেশীক নাগৰিকত্ব দি অসমত সংস্থাপন কৰিবলৈ ওলোৱাৰ প্ৰতিবাদত আজি চৰকাৰৰ অন্যতম মিত্ৰ দল অগপই বৰপেটাত এখন নাগৰিক সভা অনুষ্ঠিত কৰে।
বৰপেটা জিলা অগপৰ উদ্যোগত স্থানীয় তৰুণৰাম ফুকন স্মৃতিগৃহত অনুষ্ঠিত নাগৰিক সভাখনত বিশিষ্ট নাগৰিক, বুদ্ধিজীৱী, বিভিন্ন জাতীয় সংগঠনৰ প্ৰতিনিধিও উপস্থিত থাকে। নাগৰিক সভাখনত অংশ গ্ৰহণ কৰি অগপৰ উপ-সভাপতি তথা ৰাজ্যসভাৰ প্ৰাক্তন সাংসদ কুমাৰ দীপক দাসে নাগৰিকত্ব সংশোধনী বিধেয়ক-২০১৬ ৰ তীব্ৰ বিৰোধিতা কৰে। অসমৰ ক্ষতি হ’ব পৰা কোনো কাৰ্যকে অগপই সমৰ্থন নকৰে বুলি দাসে স্পষ্ট কৰি দিয়ে।
আনহাতে সভাখনত অংশগ্ৰহণ কৰা কমলপুৰ সমষ্টিৰ বিধায়ক সত্যব্ৰত কলিতাই নিজৰ বক্তব্যত ”অসমৰ স্বাৰ্থতকৈ বিজেপিৰে মিত্ৰতা ডাঙৰ নহয়।” বুলি তাৎপৰ্য্যপূৰ্ণ মন্তব্য কৰে।
তেওঁ কয় যে বিজেপিৰ সৰ্বভাৰতীয় নেতাৰ লগতে ৰাজ্যিক বিজেপিৰ নেতাসকলে অবৈধ হিন্দু বাংলাদেশীক সংস্থাপন কৰাৰ বিষয়টো নিশ্চয় পুনৰ বিবেচনা কৰিব। এই ক্ষেত্ৰত বিজেপিৰ নেতা সকলৰ শুভবুদ্ধি উদয় হব বুলি আশা প্ৰকাশ কৰে কলিতাই। যদি হে অবৈধ হিন্দু বাংলাদেশীক সংস্থাপন কৰাৰ বিষয়টো সন্দৰ্ভত বিজেপিয়ে চূড়ান্ত সিদ্ধান্ত গ্ৰহণ কৰে তেন্তে অগপই লগে লগে মিত্ৰতা ভংগ কৰিব বুলিও কয় বিধায়কজনে।
মন কৰিব লগীয়া যে সভাখনত উপস্থিত থকা বিশিষ্ট চিকিৎসক ডাঃ কমল কৃষ্ণ দাসে চৰকাৰৰ সৈতে চামিল হৈ অসম ধবংসকাৰী সিদ্ধান্তত অগপই কিমান পৰ্য্যায়লৈকে বিৰোধিতা কৰিব বুলি নিজৰ সন্দেহ ব্যক্ত কৰে। তেওঁ সময় থাকোতে অগপই এই বিষয়টোৰ সন্দৰ্ভত বিজেপিক নিৰ্দ্দিষ্ট সময় সীমা ধৰি দিয়া উচিত বুলি কয়। যদিহে উক্ত সময় সীমাৰ ভিতৰত বিজেপিয়ে অবৈধ হিন্দু বাংলাদেশীক সংস্থাপন কৰাৰ বিষয়টো বাদ নিদিয়ে তেন্তে অগপই বিজেপিৰ সৈতে থকা মিত্ৰতা ভংগ কৰাটো উচিত বুলি চিকিৎসক গৰাকীয়ে মন্তব্য কৰে।
বৰপেটা সমষ্টিৰ বিধায়ক গুনীন্দ্ৰ নাথ দাসৰ সভাপতিত্বত অনুষ্ঠিত সভাখনত উপস্থিত কেইবাগৰাকী বিশিষ্ট ব্যক্তিয়ে অবৈধ হিন্দু বাংলাদেশীক সংস্থাপন কৰিব বিচৰা বিষয়টোৰ তীব্ৰ বিৰোধিতা কৰে আৰু অসম চুক্তিৰ আধাৰত অসমত অবৈধ বিদেশী নাগৰিকৰ সমস্যা সমাধান কৰিবলৈ চৰকাৰক দাবী জনায়। সভাত জিলা অগপৰ সম্পাদক ধনজিৎ পাঠক, চিত্তৰঞ্জন বৰ্মনৰ লগতে কেইবাগৰাকী নেতা আৰু পাঁচ শতাধিক কৰ্মী উপস্থিত আছিল।
