অসমৰ জীয়ৰী অংকিতাক জীৱনৰ লগৰী কৰি বিয়াত বহাৰ পথত সুদৰ্শন মডেল মিলিন্দ সুমন। শনিবাৰে মুম্বাইৰ আলিবাগত বিয়া মিলিন্দ আৰু গুৱাহাটীৰ অংকিতাৰ। তেওঁলোকৰ এগৰাকী বন্ধুৱে চচিয়েল মীডিয়াত মুকলি কৰিছে তেওঁলোকৰ ‘মেহেন্দি’ অনুষ্ঠানৰ কিছু ছবি।
যোৱা মাহত দুয়োৰে ‘লিভিং টুগেদাৰ’ৰ চতুৰ্থ বাৰ্ষিকী উদযাপনৰ কৰা বহুচৰ্চিত জোৰাটোৰ বিবাহক লৈ উত্তাল হৈ পৰিছে চচিয়েল মীডিয়া।
প্ৰেমিকা, বিমান পৰিচালিকা অংকিতাৰ উপৰি অসমৰ সৈতে মিলিন্দৰ আছে আন এক বিশেষ সংযোগ। যোৱা বছৰৰ ১৫ অক্টোবৰত গুৱাহাটীত আয়োজিত মহিলাৰ মাৰাথন ‘পিংকাথন’ত যোগ দিছিলহি মডেল, চিনে’মা প্ৰযোজক তথা ফিটনেছ প্ৰম’টাৰ মিলিন্দে।
মিলিন্দৰ উদ্যোগত ২০১২ চনত আৰম্ভ হোৱা এই ‘পিংকাথন’ ভাৰতৰ সৰ্ববৃহৎ ‘মহিলাৰ মাৰাথন’। গুৱাহাটীত আয়োজিত পিংকাথনে পাইছিল অভূতপূৰ্ব সঁহাৰি।
বিপাশা বসু, গুল পানাগকে আদি কৰি বহু প্ৰখ্যাত ব্যক্তিয়ে সমৰ্থন আগবঢ়োৱা পিংকাথনে মহিলাসকলক সুস্থ জীৱনশৈলীৰ বাবে প্ৰেৰণা দিয়া আৰু স্তনৰ কৰ্কট ৰোগকে মহিাসকলৰ জীৱনক বিপদাপন্ন কৰিব পৰা বিভিন্ন বিষয়বিলাক সম্পৰ্কে তেওঁলোকক সচেতন কৰি তুলিব খোজে।
দুয়োৰে বয়সৰ ব্যৱধানক লৈ চচিয়েল মীডিয়াত বহুতে তিতকাৰী মাৰিলেও ‘Focus on the good’ শিৰোনামেৰে কিছুদিন পূৰ্বে দুয়োৰে অন্তৰংগ মুহূৰ্তৰ ছবি ইনষ্টাগ্ৰামত মুকলি কৰিছিল সুমনে।
মিলিন্দ সুমনে প্ৰথমতে ফৰাচী অভিনেত্ৰী মাইলীন জেমপানইক ২০০৬ চনত বিয়া পাতিছিল যদিও তিনি বছৰ পিছত তেওঁলোকৰ বিচ্ছেদ হয়।
সকলো সামাজিক বাধা অতিক্ৰমি অৱশেষত বিয়াত বহাৰ বাবে প্ৰস্তুত হ’ল জোৰাটো।
