বৰ্তমান অসুস্থতাত ভুগি থকা অসমৰ যশস্বী কণ্ঠশিল্পী, অসমৰ নাইটিংগেল খ্যাত দীপালী বৰঠাকুৰলৈ মুখ্য মন্ত্ৰীয়ে আজি ১ লাখ টকাৰ সাহায্য আগ বঢ়ায়।
আজি শিল্পীগৰাকীৰ ঘৰলৈ গৈ মুখ্য মন্ত্ৰীজনৰ প্ৰেছ উপদেষ্টা হৃষিকেশ গোস্বামীয়ে মুখ্য মন্ত্ৰীৰ হৈ এই ১ লাখ টকাৰ চে’ক প্ৰদান কৰে শিল্পীগৰাকীৰ স্বামী অসমৰ প্ৰখ্যাত চিত্ৰশিল্পী নীলপৱন বৰুৱাক। লগতে গোস্বামীয়ে শিল্পীগৰাকীৰ স্বাস্থ্যৰ বুজ লয় আৰু আশু আৰোগ্য কামনা কৰে। এই লাখ টকা মুখ্য মন্ত্ৰীৰ সাহায্য পুঁজিৰ পৰা দিয়া বুলি জানিব পৰা গৈছে।
উল্লেখযোগ্য যে যোৱা কিছু দিনৰ পৰা অসুস্থতাত ভুগি দীপালী বৰঠাকুৰ মহানগৰীৰ নেইমকেয়াৰ নামৰ ব্যক্তিগতখণ্ডৰ চিকিৎসালয়খনত চিকিৎসাধীন হৈ আছিল।
অসমৰ সংগীত জগতত ভোতাতৰাৰ দৰে জিলিকি থকা কোকিলকণ্ঠী শিল্পীগৰাকীৰ অসুস্থতাত তেওঁৰ অসংখ্য গুণমুগ্ধৰ লগতে শিল্পীসমাজ উদ্বিগ্ন হৈ পৰা দেখা গৈছিল। উল্লেখ কৰিব পাৰি যে নৱম শ্ৰেণীত পঢ়ি থাকোতেই ‘বন্ধু সময় পালে আমাৰ ফালে এবাৰ আহি যাবা।’ৰ দৰে জনপ্ৰিয় গীতত কণ্ঠদান কৰিছিল শিল্পীগৰাকীয়ে, যিটো আজিও সমানে জনপ্ৰিয় হৈ আছে।
কেলজ পঢ়ি থকাৰ সময়তে বিৰল মটৰ নিউৰন (Motor Neuron) ৰোগত আক্ৰান্ত হোৱা দীপালী বৰঠাকুৰে তেতিয়াৰ পৰা গান গাব নোৱৰা হয়। এই ৰোগত আক্ৰান্ত অৱস্থাতেই শিল্পীগৰাকীৰ ১৯৭৬ চনত অসমৰ আন এজন খ্যাতিমান ব্যক্তি চিত্ৰশিল্পী নীলপৱন বৰুৱাৰ লগত বিবাহ হৈছিল।
তেওঁ কণ্ঠদান কৰা আন কেইটামান জনপ্ৰিয় গীত হ’ল ‘সোণৰ খাৰু নালাগে মোক বিয়াৰ বাবে আই’, ‘জোনধনে জোনালীতে’, ‘কণমান বৰশীৰে চিপ’, ‘চেনাই মই যাওঁ দেই’ আদি।
