নাগালেণ্ডৰ ৰাজ্যপাল পি বি আচাৰ্য্যই অহা ১৩ মাৰ্চত নৱ নিৰ্বাচিত ত্ৰয়োদশ নাগালেণ্ড বিধানসভাৰ প্ৰথমখন বৈঠকৰ আহ্বান জনাইছে। পুৱা ৯.৩০ বজাত ক’হিমাৰ বিধানসভাৰ প্ৰেক্ষাগৃহত এই বৈঠক অনুষ্ঠিত হ’ব। এই কথা এটা প্ৰেছ বিজ্ঞপ্তিযোগে জানিবলৈ দিছে নাগালেণ্ড বিধানসভাৰ আয়ুক্ত আৰু সচিব বেঞ্জামিন নিউমায়ে।
উল্লেখযোগ্য যে যোৱা ২৭ ফেব্ৰুৱাৰিত অনুষ্ঠিত ৬০ খনীয়া আসনৰ নাগালেণ্ড বিধানসভাৰ নিৰ্বাচনৰ ৩ মাৰ্চত ফল ঘোষণা কৰা হৈছিল। ইয়াৰ পিছতে পূৰ্বৰ এন পি এফৰ চৰকাৰক আঁতৰাই নৱগঠিত এন ডি পি পি আৰু বিজেপি মৰ্চাই চৰকাৰ গঠন কৰিছে।
আন এটা প্ৰেছ বিজ্ঞপ্তিত তেওঁ জানিবলৈ দিছে যে একেদিনাই বিধানসভাৰ সদস্যসকলৰ দ্বাৰা অধ্যক্ষক নিৰ্বাচন কৰা হ’ব। ইয়াৰ বাবে ১২ মাৰ্চৰ দুপৰীয়া ১২ বজা পৰ্য্যন্ত মনোনয়ন পত্ৰ জমা দিব পাৰিব আৰু উক্ত দিনাৰে ১ বজাৰ পৰা ৪ বজালৈকে মনোনয়ন পত্ৰ প্ৰত্যাহাৰৰ সময় ধাৰ্য্য কৰা হৈছে।
এই প্ৰথম অধিৱেশনৰ বাবে যাৱতীয় প্ৰস্তুতি তথা কাৰ্য্যসূচী নিৰ্বাৰণ কৰাৰ বাবে ইতিপূৰ্বে অস্থায়ী অধ্যক্ষ মহোনলুমো কিকনৰ অধ্যক্ষতাত বিজনেছ এডভাইজৰি কমিটিৰ এখন বৈঠক অনুষ্ঠিত হৈছে। এই কমিটিয়ে অধিৱেশন অহা ১৩ মাৰ্চৰ পৰা ২৬ মাৰ্চলৈ অনুষ্ঠিত কৰাৰ সিদ্ধান্ত লৈছে বুলি বিজ্ঞপ্তিটোত জনোৱা হৈছে।
প্ৰথমখন অধিৱেশন বিশেষকৈ বিধানসভাৰ সদস্যসকলৰ শপত গ্ৰহণ, অধ্যক্ষ নিৰ্বাচন, সংখ্যাগৰিষ্ঠতা প্ৰমাণ, ৰাজ্যপালৰ ভাষণ, ৰাজ্যপালৰ ভাষণৰ ধন্যবাদসূচক মন্তব্য, প্ৰতিবেদন দাখিল, ২০১৭-১৮ বৰ্ষৰ অনুমোদনৰ বাবে পৰিপূৰক দাবী, ২০১৮-১৯ বাজেট উপস্থাপন ইত্যাদি কাৰ্য্যসূচী থাকিব বুলি সূত্ৰটোৱে জনাইছে।
