শনিবাৰে অৰুণাচলৰ উদ্যোগ মন্ত্ৰী টামিঅ’ টাগাই ৰাজ্যখনত উৎপাদিত দেশৰ প্ৰথম জৈৱিক কিৱি সুৰা আনুষ্ঠানিকভাৱে মুকলি কৰে। গুৱাহাটীৰ এখন হোটেলত মুকলি কৰা এই জৈৱিক কিৱি সুৰা ব্ৰেণ্ডটোৰ নাম হৈছে নাৰা আবা।
উল্লেখযোগ্য যে নামনি সোৱণশিৰি জিলাৰ জিৰোৰ হং গাঁৱত লামবু-ছুবু ফুড এণ্ড বেভাৰেজেছ নামৰ প্ৰতিষ্ঠানটোৱে এই কিৱি সুৰাবিধৰ উৎপাদন আৰম্ভ কৰিছে। স্থানীয় এই ফলবিধৰ পৰা উৎপাদিত এই সুৰাই পাহাৰীয়া ৰাজ্যখনৰ সুৰা উদ্যোগটোক এক নতুন মাত্ৰা দিব বুলি আশা কৰা হৈছে।
লামবু-ছুবু ফুড এণ্ড বেভাৰেজেছ নামৰ প্ৰতিষ্ঠানটো হৈছে ছুইজাৰলেণ্ডৰ পাছতে বিশ্বৰ দ্বিতীয় জৈৱিক সুৰা প্ৰস্তুত কৰা কোম্পানী।
জানিব পৰা মতে অৰুণাচল প্ৰদেশত বাৰ্ষিক হাৰত প্ৰায় ৯,৪২৮ মেট্ৰিক টন সুৰা উৎপাদন হয়। যাৰ ভিতৰত নামনি সোৱণশিৰি জিলাত উৎপাদন হোৱা এই ফলবিধৰ পৰিমাণ হৈছে ২৫০০ মেট্ৰিক টন।
উল্লখযোগ্য যে অনুষ্ঠানটোত উপস্থিত থাকি উদ্যোগ মন্ত্ৰী টাগাই কয় যে নাৰা আবা হৈছে উত্তৰ পূৰ্বাঞ্চলৰ এটা ব্ৰেণ্ড আৰু সকলোৱে ইয়াত বিনিয়োগ কৰিব পাৰে। আনহাতে ৰাজ্যখনৰ ঔদ্যোগিক নীতি পূৰ্বৰ তুলনাত যথেষ্ট শিথিল কৰা বুলি উল্লেখ কৰি মন্ত্ৰী গৰাকীয়ে খাদ্য সংশাধন ক্ষেত্ৰত বিনিয়োগকাৰীসকলক বিনিয়োগ কৰিবলৈ আহ্বান জনায়।
