পেমা খাণ্ডূ নেতৃত্বাধীন অৰুণাচল প্ৰদেশৰ বিজেপি চৰকাৰৰ ৰাজ্যিক কেবিনেটত আজি ৩১ নং আলং পূব সমষ্টিৰ বিধায়ক জাৰ্কাৰ গামলিনক অন্তৰ্ভুক্ত কৰা হৈছে।
অৰুণাচল প্ৰদেশৰ ৰাজ্যপাল ব্ৰিগেডিয়াৰ ড০ বি ডি মিশ্ৰ (অৱসৰপ্ৰাপ্ত)ই ইটানগৰৰ ৰাজভৱনৰ দৰবাৰ হলত নতুন মন্ত্ৰীগৰাকীক গোপনীয়তা আৰু সাংবিধানিক দায়িত্ব গ্ৰহণৰ শপত বাক্য পাঠ কৰোৱায়।
অনুষ্ঠানত ৰাজ্যখনৰ প্ৰথম মহিলা নীলম মিশ্ৰ, মুখ্যমন্ত্ৰী পেমা খাণ্ডু, ৰাজ্য বিধানসভাৰ অধ্যক্ষ টি এন থংদক, ৰাজ্যৰ কেবিনেট মন্ত্ৰী বৰ্গ, সংসদীয় সচিবসকল, বিধায়কসকল, ৰাজ্যৰ জ্যেষ্ঠ আমোলাসকল, পৌৰ নিগম পৰিষদৰ সদস্যসকল, সামাজিক নেতা, বিশিষ্ট অতিথি তথা আমন্ত্ৰিত অতিথিসকল উপস্থিত আছিল।
কেবিনেটত গামলিনৰ অন্তৰ্ভুক্তিয়ে পেমা খাণ্ডু চৰকাৰৰ শক্তি বৃদ্ধি কৰিব বুলি সচেতন মহলে আশা ব্যক্ত কৰিছে।
ৰাজনৈতিক অভিজ্ঞতাসম্পন্ন জাৰ্কাৰ গামলিনক কি দপ্তৰ দিয়া হ’ব সেইটো এতিয়াও প্ৰকাশ কৰা হোৱা নাই যদিও মুখ্যমন্ত্ৰীয়ে তেওঁক এটা গুৰুত্বপূৰ্ণ বিভাগ প্ৰদান কৰাৰ কথা প্ৰকাশ কৰিছে দলৰ এক সূত্ৰই।
