অৰুণাচল প্ৰদেশৰ চীন সীমান্তৱৰ্তী দিবাং উপত্যকা জিলাৰ আনিনীত আজি ৰাজ্যখনৰ মুখ্য মন্ত্ৰী পেমা খাণ্ডুৱে চৰকাৰী পলিটেকনিক শিক্ষানুষ্ঠানৰ আধাৰ শিলা স্থাপন কৰে।
আধাৰ শিলা স্থাপনৰ পাছতেই মুখ্য মন্ত্ৰী খাণ্ডুৱে নিজৰ মত প্ৰকাশ কৰি কয় যে এই চৰকাৰী পলিটেকনিকখনৰ জৰিয়তে জিলাৰ সকলো পৰ্যায়ৰ লোকৰ লগতে ৰাজ্যখনৰ অতিকৈ ভিতৰুৱা অঞ্চলৰ লোকেও সুবিধা গ্ৰহণ পাৰিব।
পলিটেকনিক শিক্ষানুষ্ঠানখনৰ আধাৰ শিলা স্থাপন কৰাৰ পাছত খাণ্ডুৱে উক্ত অঞ্চলতে আন এখন শিক্ষানুষ্ঠান বিবেকানন্দ কেন্দ্ৰীয় বিদ্যালয়ৰো আধাৰ শিলা স্থাপন কৰে।
দুয়োখন শিক্ষানুষ্ঠানৰে আধাৰ শিলা স্থাপন কৰি খাণ্ডুৱে সীমান্তৱৰ্তী অঞ্চল উন্নয়ন আঁচনিৰ অধীনত কেন্দ্ৰীয় চৰকাৰে অৰুণাচল প্ৰদেশৰ বাবে আৱণ্টন কৰা ১৫ কোটি টকা সন্দৰ্ভত প্ৰধান মন্ত্ৰী নৰেন্দ্ৰ মোডীক ধন্যবাদ জ্ঞাপন কৰে।
উল্লেখ্য যে আনিনী অঞ্চল পৰিভ্ৰমণ কৰা খাণ্ডুৰ উপস্থিতিতে আজি আনিনী বিধানসভা সমষ্টিৰ অন্তৰ্গত জিলা পৰিষদৰ অধ্যক্ষ, পঞ্চায়ত পৰ্যায়ৰ নেতাৰ লগতে মুঠ ৯৬গৰাকী লোকে ভাৰতীয় জনতা পাৰ্টী(বিজেপি)দলত অন্তৰ্ভুক্তি হয়।
