‘ৰকিবুল হুছেইনকে ধৰি কিছুসংখ্যক কংগ্ৰেছী নেতা-বিধায়কক আক্ৰমণৰ লক্ষ্য কৰি লৈ এটাৰ পিছত আন এটা ভুৱা গোচৰ জাপি দিয়াৰ চেষ্টা চলাইছে বিজেপি চৰকাৰে। বিধান সভাৰ নিৰ্বাচনৰ সময়তো এনে ধৰণে ৰকিবুল হুছেইনৰ ঘৰত তালাচী চলোৱা হৈছিল। ঠিক সেইদৰে পঞ্চায়ত নিৰ্বাচন সমাগত বাবেই এনেধৰণৰ ভুৱা গোচৰ জাপি দিব বিচৰা হৈছে কংগ্ৰেছী বিধায়কসকলৰ ওপৰত।‘ বিধান সভাৰ আজিৰ দিনটোৰ বাজেট অধিৱেশনৰ অন্তত কংগ্ৰেছৰ মুখপাত্ৰ তথা সাধাৰণ সম্পাদক দুৰ্গাদাস বড়োৱে এই মন্তব্য কৰে।
তদুপৰি তেওঁ অসম চৰকাৰৰ প্ৰতি প্ৰশ্ন উত্থাপন কৰি কয়, ‘ৰঞ্জিত দত্তৰ বিৰুদ্ধে শাসকীয় দলৰে সাংসদ আৰ পি শৰ্মাই ১০ শতাংশকৈ ঘোচ লোৱা বুলি ৰাজহুৱাভাৱে অভিযোগ অনাৰ পিছতো তেওঁৰ বিৰুদ্ধে বিজেপি চৰকাৰে কিয় কোনো পদক্ষেপ গ্ৰহণ নকৰিলে?’
আনহাতে ভিজিলেন্স ডকুমেণ্টৰ ফালৰ পৰা ৰকিবুল হুছেইনলৈ প্ৰেৰণ কৰা এখন চিঠি সন্দৰ্ভত বড়োৱে কয়, ‘১৭ মাৰ্চতে প্ৰেৰণ কৰা এই চিঠিখন কেনেকৈ কালি ভাইৰেল হ’বলৈ পালে? সেই চিঠিখনতো কেৱল চৰকাৰৰ সংশ্লিষ্ট কৰ্তৃপক্ষৰ হাততহে থাকিব লাগিছিল। বিজেপি চৰকাৰ এনেদৰেই কংগ্ৰেছৰ বিৰুদ্ধে ষড়যন্ত্ৰত লিপ্ত হৈছে।‘
তেওঁ কেৱল কংগ্ৰেছী প্ৰাক্তন মন্ত্ৰী আৰু বিধায়কসকলক মিছা দোষ জাপি দিয়াতকৈ বিজেপি চৰকাৰৰ দুৰ্নীতিগ্ৰস্ত মন্ত্ৰী-বিধায়কসকলকো তদন্তৰ আওতালৈ অনাৰ বাবে অসম চৰকাৰক আহ্বান জনায়।
আনহাতে, অভিযুক্ত প্ৰাক্তন মন্ত্ৰী ৰকিবুল হুছেইনে এই বিষয়ত সংবাদ মাধ্যমৰ সন্মুখত মন্তব্য ৰাখি কয় যে তেওঁৰ বাসগৃহতো বিধানসভাৰ নিৰ্বাচনৰ সময়ত তালাচী চলাইছিল আৰু সেই তালাচী চলোৱা ঘটনাই সমগ্ৰ অসমতে এটা অপ্ৰীতিকৰ পৰিস্থিতিৰ সৃষ্টি কৰিছিল। তালাচী চলোৱা বিষয়াজনক চাকৰিৰ পৰা বৰ্খাস্ত কৰা হৈছিল বুলিও তেওঁ মন্তব্য আগবঢ়ায়।‘
তদুপৰি তেওঁ অনিল ৰাজাক ৪২০ আখ্যা দি কয় যে তেওঁৰ দৰে ৪২০ লোক এজনৰ চিঠি তথা গোচৰৰ ভিত্তিত যদি মোৰ বিৰুদ্ধে বিজেপি চৰকাৰে এনেধৰণৰ স্থিতি লৈছে তেন্তে বেলেগৰ প্ৰতিও একে ব্যৱস্থা চৰকাৰখনে গ্ৰহণ কৰিব লাগিব। লগতে তেওঁ স্বাস্থ্য আৰু শিক্ষা আৰু পৰিবহণ বিভাগত চলি থকা কেলেংকাৰিৰো সঠিক তদন্ত কৰিবৰ বাবে আহ্বান জনায়, তেতিয়াহে সমবিচাৰ কৰা হ’ব বুলি তেওঁ উল্লেখ কৰে।
তাৎপৰ্য্যপূৰ্ণভাবে প্ৰাক্তন মন্ত্ৰীগাৰীয়ে কংগ্ৰেছ দলতে ০.১ শতাংশ বিজেপিৰ এজেণ্ট থকা বুলি মন্তব্য কৰে।
লগতে তেওঁ কয় ‘ইমানেই গোপনীয়তা অৱলম্বন কৰা ভিজিলেন্স বিভাগৰ চিঠিখন কেনেকৈ কালি ভাইৰেল হ’বলৈ পালে? কালিৰ বিধানসভাত বিষয়টো উত্থাপন হোৱাৰ পিছতেই এই চিঠিখন তেওঁলোকে ভাইৰেল কৰি দিছে। তদন্ত কৰক মোৰ আপত্তি নাই। কিন্তু নিয়ম-নীতি অনুকৰণ কৰি তদন্ত প্ৰক্ৰিয়া চলাই নিয়ক।‘
আনহাতে বিৰোধী দলৰ দলপতি দেবব্ৰত শইকীয়াই সংবাদ মাধ্যমৰ আগত কয়, ‘বিজেপি দলে কংগ্ৰেছ চৰকাৰ দুৰ্নীতিগ্ৰস্ত বুলি কৈ জনসাধাৰণৰ অন্তৰ জয় কৰিছিল। কিন্তু কালি মই বিধানসভাত কেইগৰাকীৰ বিৰুদ্ধে চি আই ডি তথা উচ্চ পৰ্য্যায়ৰ তদন্ত হোৱা বুলি প্ৰশ্ন কৰাত তেওঁলোকে কংগ্ৰেছৰ কোনো মন্ত্ৰী-বিধায়কৰ বিৰুদ্ধে গোচৰ পঞ্জীয়ন বৰ্তমানলৈকে কৰা হোৱা নাই বুলি সদৰী কৰে। কংগ্ৰেছৰ এজন নাইবা দুজন মন্ত্ৰীৰ বিৰুদ্ধে অভিযোগ পাইছে যদিও তেওঁলোকৰ বিৰুদ্ধে উত্থাপিত অভিযোগ সত্য নে অসত্য সেয়া বৰ্তমানলৈকে বিজেপি চৰকাৰে স্পষ্ট কৰিব পৰা নাই।
লগতে তেওঁ কয়, ‘পূৰ্বতে কংগ্ৰেছত থকা আৰু বৰ্তমান শাসকীয় দলৰ মন্ত্ৰী-বিধায়কৰ বিৰুদ্ধেও লুই বাৰ্জাৰ কেলেংকাৰি, সাৰদা কেলেংকাৰি, ৰ’জ ভেলি কেলেংকাৰি ইত্যাদিত জড়িত হৈ চি বি আইৰ অধীনত গোচৰ পঞ্জীয়ন হৈছিল যদিও বৰ্তমান তেওঁলোকৰ কথাটো উত্থাপন কৰা হোৱা নাই। যাৰ ফলস্বৰূপে বিধানসভাখনক তেওঁলোকে বিপথে পৰিচালিত কৰা বুলি অনুভৱ হয়।‘
