সমাগত পোহৰৰ উৎসৱ দিপাৱলী। দিপাৱলীৰ প্ৰাক:ক্ষণত আতচবাজীৰ প্ৰস্তুতত ব্যস্ত হৈ পৰিছে আতচবাজী নিৰ্মাণ কাৰখানাসমূহ। পিছে দিপাৱলীক আদৰাৰ এই প্ৰস্তুতিৰ সময়তে শোকাৱহ দুই ঘটনাই শোকাকুল পৰিৱেশৰ সৃষ্টি কৰিছে।
মঙলবাৰে তামিলনাডুৰ বিৰুধুনগৰ জিলাত দুই আতচবাজী কাৰখানাত হোৱা বিধ্বংসী অগ্নিকাণ্ডত এঘাৰজন লোক নিহত হোৱাৰ লগতে দুজন আহত হয়। জিলাখনৰ ৰঙাপলায়াম আৰু কিচানায়কনপট্টি নামৰ দুই অঞ্চলত হয় এই শোকাৱহ ঘটনা।
আৰক্ষী, অগ্নিনিৰ্বাপক বাহিনীৰ কৰ্মী আৰু স্থানীয় লোকৰ সামগ্ৰিক প্ৰচেষ্টাত দুয়োটা স্থানতে অগ্নি নিৰ্বাপন কৰা হয় আৰু ভুক্তভোগীক উদ্ধাৰৰ চেষ্টা চলোৱা হয়।
আৰক্ষীৰ এগৰাকী জ্যেষ্ঠ বিষয়াই সদৰী কৰা মতে, ৰঙাপলায়ামৰ আতচবাজী ইউনিটৰ বিস্ফোৰণথলীৰ পৰা মুঠ সাতটা জ্বলি যোৱা মৃতদেহ উদ্ধাৰ কৰা হৈছে। মৃতদেহকেইটাৰ পৰিচয় এতিয়াও জানিব পৰা হোৱা নাই।
নিহত লোককেইজন আতজবাজী কাৰখানাটোত কৰ্মৰত শ্ৰমিক হ’ব পাৰে বুলি আৰক্ষীয়ে সন্দেহ প্ৰকাশ কৰিছে। আনহাতে ঘটনাস্থলীৰ পৰা সংকটজনক অৱস্থাত উদ্ধাৰ হোৱা তিনিজন লোকে পিছত মৃত্যুক সাৱটি লয়।
ইফালে কিচানায়কনপট্টিৰ আতচবাজী ইউনিটত এনেধৰণৰ আন এক ঘটনাত এজন লোকৰ মৃত্যু হয়। আৰক্ষীয়ে জনোৱা মতে, এই বিস্ফোৰণত দুগৰাকী মহিলা শ্ৰমিকক আঘাতপ্ৰাপ্ত অৱস্থাত উদ্ধাৰ কৰা হয়।
উদ্ধাৰ হোৱা দুয়োগৰাকী মহিলা শ্ৰমিকক তাৎক্ষণিকভাৱে চিকিৎসালয়ত ভৰ্তি কৰোৱা হয়। আৰক্ষীৰ তথ্য মতে, দুয়োটা কাৰখানাৰে বৈধ অনুজ্ঞাপত্ৰ আছিল। ঘটনা সন্দৰ্ভত তদন্ত আৰম্ভ কৰা হৈছে বুলি আৰক্ষীয়ে সদৰী কৰে।
তামিলনাডুৰ মুখ্যমন্ত্ৰী এম কে ষ্টেলিনে এই শোকাৱহ ঘটনাত শোক প্ৰকাশ কৰি মৃতকৰ পৰিয়াললৈ ৩ লাখ টকাকৈ আৰু গুৰুতৰভাৱে আহতসকলৰ বাবে ১ লাখ টকাৰ সাহায্য ঘোষণা কৰে।
