অসম বিধানসভাৰ অধিৱেশন চলি থকাৰ সময়তে সদৌ অসম হোমিঅ’পেথিক ছাত্ৰ সন্থাকে ধৰি হোমিঅ’পেথিক চিকিৎসকৰ তিনিটা সংগঠনে দিছপুৰ লাষ্টগেটত গ্ৰহণ কৰা গণতান্ত্ৰিক আন্দোলনৰ কাৰ্যসূচীত আৰক্ষীয়ে বৰ্বৰোচিতভাৱে লাঠীচালনা কৰাৰ প্ৰতিবাদত ৰাজ্যখনৰ তিনিওখন হোমিঅ’পেথিক কলেজত শুকুৰবাৰে হোমিঅ’পেথিক কনিষ্ঠ চিকিৎসক সন্থাই ক’লা দিৱস পালন কৰাৰ লগতে জোঁৰ সমদল উলিয়ায়।
নগাঁৱতো হোমিঅ’পেথিক কলেজৰ ছাত্ৰ-ছাত্ৰীসকলে কলেজখনৰ পৰা লক্ষ্মীনগৰ চাৰিআলি হৈ নগাঁও চহৰত এক জোঁৰ সমদল উলিযায়।
জোঁৰ সমদলত জিলা ছাত্ৰ মুক্তি সংগ্ৰাম সমিতিৰ সভাপতি ইমজামামুল হক, উপ-সভাপতি নজমুল হুছেইনৰ লগতে জিলা সমিতিৰ ভালেসংখ্যক সদস্যই অংশগ্ৰহণ কৰে।
জোঁৰ সমদলত অংশগ্ৰহণ কৰি অসম কনিষ্ঠ হোমিঅ’পেথিক চিকিৎসক সন্থাৰ সভাপতি নেৱাজ শ্বৰিফে দিছপুৰৰ ঘটনাত ক্ষোভ প্ৰকাশ কৰি কয় যে আমাৰ প্ৰাপ্য অধিকাৰ দিয়াৰ বিপৰীতে চৰকাৰে আমাৰ ওপৰত অত্যাচাৰহে চলালে।
আনহাতে, দিছপুৰ ঘটনাৰ প্ৰতিবাদত সদৌ অসম হোমিঅ’পেথিক ছাত্ৰ সন্থাই শনিবাৰৰ পৰা ৰাজ্যৰ তিনিওখন হোমিঅ’পেথিক কলেজতে তলা বন্ধ কাৰ্যসূচী ৰূপায়ণ কৰাৰ সিদ্ধান্ত গ্ৰহণ কৰিছে।
যোৱা ২৮ ফেব্ৰুৱাৰীত দিছপুৰ লাষ্টগেটত শান্তিপূৰ্ণভাৱে ধর্মঘটৰ কাৰ্যসূচী গ্ৰহণ কৰা অসম হোমিঅ’পেথিক চিকিৎসক সন্থাৰ সদস্যসকলৰ ওপৰত আৰক্ষীয়ে কৰা লাঠীচলানাত ৫০ জনৰো অধিক হোমিঅ’পেথিক চিকিৎসক আহত হৈছিল।
