আমচাঙৰ উচ্ছেদিতক সংস্থাপন আৰু স্বায়ত্ত্ব পৰিষদসমূহক ষষ্ঠ অনুসূচীত অন্তৰ্ভুক্ত কৰাৰ দাবী ট্ৰাইবেল সংঘৰ
শনিবাৰে সদৌ অসম ট্ৰাইবেল সংঘৰ গুৱাহাটী জিলা কমিটিৰ এখন জৰুৰী কৰ্যনিৰ্বাহক বৈঠক গণেশগুৰিৰ নয়নপুৰত অৱস্থিত কাৰ্যালয়ত অনুষ্ঠিত হৈ যায়। সংঘৰ জিলা উপ সভাপতি নৰেশ্বৰ কোঁৱৰৰ সভাপতিত্বত অনুষ্ঠিত সভাত সাধাৰণ সম্পাদক ভোলাৰাজ দলেই সভাৰ উদ্দেশ্য বাখ্যা কৰি কয় যে আমচাঙৰ খিলঞ্জীয়া লোকসকলৰ উচ্ছেদ বন্ধ কৰিব লাগে আৰু উচ্ছেদ কৰাসকলক উপযুক্ত ক্ষতিপূৰণ দিয়াৰ লগতে পুনৰ সংস্থাপনৰ দিহা কৰিব লাগে।
অহা ১৯,২০ আৰু ২১ ডিচেম্বৰত সদৌ অসম ট্ৰাইবেল সংঘৰ কেন্দ্ৰীয় সাধাৰণ অধিবেশন অনুষ্ঠিত হ’ব। উক্ত অধিবেশনতেই জনজাতিসকলৰ চাকৰিৰ বেকলগসমূহ পূৰণ কৰা, জনজাতি বেল্ট আৰু ব্লকৰ বেদখল হৈ থকা চৰণীয়া পথাৰ মুক্ত কৰা, ছাত্ৰ-ছাত্ৰীৰ জলপানি সময়মতে মুকলি কৰি দিয়া, চৰকাৰী চাকৰিৰ নিযুক্তিৰ ক্ষেত্ৰত সংৰক্ষণ বিধি কাৰ্যকৰী কৰা আদি বিভিন্ন দাবী সম্পৰ্কত প্ৰস্তাৱ গ্ৰহণ কৰা হ’ব ।
উক্ত সমস্যাসমূহৰ স্থায়ী সমাধান অবিহনে সংঘই অসমৰ জনজাতীয় সংগঠনসমূহৰ সৈতে মিলি তীব্ৰ গণতান্ত্ৰিক আন্দোলন গঢ়ি তুলিব বুলি সাধাৰণ সম্পাদক ভোলাৰাজ দলেই জানিব দিয়ে।
আনহাতে, ৰাভা হাচং, তিৱা, মিচিং, দেউৰী, সোণোৱাল-কছাৰী, ঠেঙাল-কছাৰী জনগোষ্ঠীক ষষ্ঠ অনুসূচীত অন্তৰ্ভুক্ত চৰকাৰৰ সিদ্ধান্তক আদৰণি জনাই সংঘই অন্যান্য স্বায়ত্ত্ব পৰিষদসমূহকো ষষ্ঠ অনুসূচীত অন্তৰ্বুক্ত কৰাৰ দাবী উত্থাপন কৰে।
ট্ৰাইবেল সংঘৰ জিলা সমিতিৰ প্ৰচাৰ সম্পাদক এল এন দেউৰীয়ে কয় যে সদৌ অসম ট্ৰাইবেল সংঘই যিকোনো ত্যাগৰ বিনিময়ত অসমত জনজাতিসকলৰ মৰ্যাদা প্ৰতিষ্ঠা কৰিবলৈ বদ্ধ পৰিকৰ আৰু শীঘ্ৰেই তেওঁলোকে এই সম্পৰ্কত এক কাৰ্যসূচী প্ৰস্তুত কৰিব।