আলফা (স্বাধীন)এ অপহৰণ কৰা জাগুনৰ গোপাল উপাধ্যায়ক একমাত্ৰ মানৱীয় দৃষ্টিভংগীৰে মুকলি কৰি দিবলৈ আছু আৰু ২৮টা জনগোষ্ঠীয় সংগঠনে আজি ২১ জুনত আহ্বান জনাইছে।
‘একমাত্ৰ মানৱীয় দৃষ্টিভংগীৰে গোপাল উপাধ্যায়ক মুকলি কৰি দিবলৈ আহ্বান’ জনাই আছুৰ সাধাৰণ সম্পাদক লুৰীনজ্যোতি গগৈয়ে প্ৰেৰণ কৰা বিবৃতিটোত সংগঠনকেইটাই এই অপহৰণৰ ঘটনাটোত ‘উদ্বেগ প্ৰকাশ কৰিছে’ বুলি কোৱা হৈছে।
উল্লেখযোগ্য যে জাগুন আৰক্ষী চকীৰ অন্তৰ্গত ৩ নং উদয়পুৰৰ বাসিন্দা তথা এখন ব্যক্তিগত মালিকানাধীন ক্ষুদ্ৰ চাহ বাগিচাৰ মহৰী দীননাথ ওৰফে গোপাল উপাধ্যায় (৫০)ক যোৱা ৮ জুনত আলফা (স্বাঃ)এ অপহৰণ কৰিছিল।
ইয়াৰ পূৰ্বে যোৱা ১১ জুনত দীননাথৰ পৰিয়ালটোৱে আৰু গোৰ্খা ছাত্ৰ সন্থাৰ টিৰাপ জাগুন আঞ্চলিক সমিতিয়ে তেওঁক মুকলি কৰি দিয়াৰ বাবে আলফাক কাতৰ আৱেদন জনাইছিল।
অপহৃত উপাধ্যায়ে ‘মাৰ্ঘেৰিটা সমষ্টিৰ বিধায়ক ভাস্কৰ শৰ্মা আৰু তেওঁৰ ঘনিষ্ঠ জাগুনৰ ব্যৱসায়ী ৰাধা চেতিয়াই মোক আলফা আৰু এন এছ চি এনৰ বিৰুদ্ধে চোৰাংচোৱা গিৰি কৰিবলৈ ৰাখিছিল’ বুলি ‘স্বীকাৰ’ কৰাৰ এক ভিডিঅ’ আলফা (স্বাধীন)এ ফে’ছবুকত প্ৰচাৰ কৰাৰ পিছত ব্যৱসায়ী ৰাধা চেতিয়াৰ ঘৰৰ সন্মুখত যোৱা ১৭ জুনত গোৰ্খা ছাত্ৰ সন্থাই প্ৰতিবাদ কৰিছিল।
অপহৃত লোকজন কুশলে আছে বুলি আলফা (স্বাধীন)ৰ সেনাধ্যক্ষ পৰেশ বৰুৱাই ১২ জুনত ব্যৱসায়ী ৰাধা চেতিয়াক ফ’নযোগে জনোৱাৰ উপৰি জ্যেষ্ঠ নেতা মাইকেল ডেকা ফুকনে দীননাথৰ মুক্তিৰ বাবদ ৩ কোটি ৫০ লাখ টকা দাবী কৰিছিল।