দুবছৰৰ অপেক্ষাৰ অন্তত চাকিয়িং-পেনটং আৰু টিংভং গাওঁ পঞ্চায়ত দুখনৰ মাজত পুনৰ চলিল যান-বাহন। উত্তৰ ছিকিমৰ উজনি জংগুৰ ছিয়ক ভিৰত মণ্টম জলাশয়ৰ ওপৰত নিৰ্মাণ কৰা দলঙৰ আনুষ্ঠানিক শুভউদ্বোধনৰ লগে লগে পুনৰ দুয়োটা অঞ্চল সংলগ্ন হোৱা পৰিলক্ষিত হ’ল।
উল্লেখ্য যে ২০১৬ চনৰ ১৩ আগষ্টৰ দিনা ছিয়ক ভিৰত অঞ্চলত হোৱা ভয়ানক গৰাহখহনীয়াতে এটা কৃত্ৰিম জলাশয় সৃষ্টি হৈছিল। আৰু ইয়াৰ ফলত সেই দুই অঞ্চলৰ মাজত সকলো ধৰণৰ সম্পৰ্ক বিচ্ছিন্ন হৈ পৰিছিল। কিন্তু নতুন দলঙখনে এই সমস্যাৰ ওৰ পেলাব বুলি ধাৰণা কৰিছে চাকিয়িং-পেনটং আৰু টিংভং গাওঁ পঞ্চায়ত দুখনৰ জনসাধাৰণে।
নতুনকৈ উদ্বোধন কৰা দলঙখন, পথ আৰু দলং নিৰ্মাণ বিভাগৰ আদেশত ভূমি ৰাজহ আৰু দুৰ্যোগ ব্যৱস্থাপনা বিভাগৰ দ্বাৰা নিৰ্মাণ কাৰ্য সম্পন্ন কৰা হৈছে। ২২ মিটাৰ দৈৰ্ঘ্যৰ এই নতুন দলঙখনৰ সৰ্বোচ্চ বহন ক্ষমতা ১০ টন বুলিও জনাইছে বিভাগীয় কৰ্তৃপক্ষই।
আনহাতে বুধবাৰে নৱ নিৰ্মিত দলঙখন শুভ উদ্বোধন কৰে ছিকিম বিধানসভাৰ সহকাৰী অধ্যক্ষ তথা জংগুৰ স্থানীয় বিধায়ক ছোনাম জ্ঞাতছো লেপছাই।
দলঙখন উদ্বোধন কৰি বিধানসভাৰ অধ্যক্ষগৰাকীয়ে যথেষ্ট উৎফুল্লিত হোৱা পৰিলক্ষিত হয়। তেওঁ ৰেঙিইয়ং নদীৰ পাৰত অৱস্থিত হুয়োখন পঞ্চায়তৰ মুঠ ১১খন গাওঁৰ লোকক পুনৰ এই নতুন দলঙখনে সংলগ্ন কৰিব বুলি আনন্দ প্ৰকাশ কৰে।
আনহাতে তেওঁ লগতে কয় যে এইখন এখন অস্থায়ী দলং, অতি শীঘ্ৰে স্থায়ী দলং নিৰ্মাণৰ বাবে কাম আৰম্ভ কৰিম। ইয়াৰ লগতে স্থানীয় বিধায়কগৰাকীয়ে দলঙখন নিৰ্মাণ কৰি উলিওৱা সকলো লোককে ধন্যবাদ জ্ঞাপন কৰে।
