ভাৰত চৰকাৰৰ শক্তি বিভাগৰ দ্বাৰা আয়োজন কৰা শক্তি সংৰক্ষণ-২০১৭ শীৰ্ষক এখন পেইন্টিং প্ৰতিযোগিতাত উত্তৰ পূৰ্বাঞ্চৰ ৰাজ্যকেইখনৰ ভিতৰতে শ্ৰেষ্ঠ পাৰদৰ্শিতাৰ সন্মান লাভ কৰিছে ছিকিম চৰকাৰৰ মানৱ সম্পয়ন উন্নয়ন বিভাগে।
নতুন দিল্লীৰ বিজ্ঞান ভৱনত বৃহস্পতিবাৰে অনুষ্ঠিত হোৱা ৰাষ্ট্ৰীয় শক্তি সংৰক্ষণ দিৱসৰ এক জাকজমকীয়া অনুষ্ঠানত ভাৰত চৰকাৰৰ শক্তি বিভাগে ছিকিমক এই সন্মানেৰে সন্মানিত কৰে। কেন্দ্ৰীয় চৰকাৰৰ শক্তি আৰু বিদ্যুৎ বিভাগৰ ৰাজ্যমন্ত্ৰী (স্বতন্ত্ৰ দায়িত্ব) ৰাজ কুমাৰ সিঙৰ পৰা বঁটাটো গ্ৰহণ কৰে ছিকিমৰ মানৱ সম্পদ উন্নয়ন বিভাগৰ অতিৰিক্ত মুখ্য সচিব জি পি উপাধ্যায়ে।
অনুষ্ঠানটোত মুখ্য অতিথি হিচাপে উপস্থিত থাকে ভাৰতৰ ৰাষ্ট্ৰপতি ৰামনাথ কোৱিন্দে।
নিজৰ চমু ভাষণত মানৱ সম্পদ উন্নয়ন বিভাগৰ অতিৰিক্ত মুখ্যসচিব গৰাকীয়ে এই সাফল্যৰ বাবে সংশ্লিষ্ট সকলোকে ধন্যবাদ জনায়।
অনুষ্ঠানটোত ৰাষ্ট্ৰপতি কোৱিন্দে শক্তি সংৰক্ষণৰ ক্ষেত্ৰত উল্লেখযোগ্য বৰঙণি আগবঢ়োৱা অন্যান্য ব্যক্তি আৰু অনুষ্ঠানলৈ বঁটাসমূহ প্ৰদান কৰে।
বঁটা প্ৰাপ্ত পেইন্টিং সমূহেৰে অনুষ্ঠানটো সজাই তোলাৰ উপৰিও ‘শক্তি যোগ্য সাফল্য’ শীৰ্ষক এখনি ছবিও প্ৰদৰ্শন কৰা হয়।
এই দিৱসটো শক্তি যোগ্যতা আৰু সংৰক্ষণৰ বিষয়ে সজাগতা সৃষ্টিৰ উদ্দেশ্যে বিদ্যুৎ বিভাগৰ ব্যুৰো অফ এনাৰ্জি এফিচিয়েন্সি (বি ই ই)ৰ দ্বাৰা উৎযাপন কৰা হয়। বি ই ই এ জনোৱা মতে ৰাষ্ট্ৰীয় পেইন্টিং প্ৰতিযোগিতাত এই বছৰ প্ৰায় ১ কোটি শিশুৱে অংশগ্ৰহণ কৰাৰ উপৰিও ৰাষ্ট্ৰীয় শক্তি সংৰক্ষণ বঁটাৰ বাবে কেইবা শ ঔদ্যোগিক গোট আৰু প্ৰতিষ্ঠানে অংশগ্ৰহণৰ বাবে পত্ৰ প্ৰেৰণ কৰিছিল।
বি ই ই য়ে জনোৱা অনুসৰি এই দিৱসটো উৎযাপনৰ জৰিয়তে জনসাধাৰণৰ মাজত শক্তিৰ গুৰুত্ব আৰু কম শক্তি ব্যৱহাৰৰ জৰিয়তে শক্তি ৰাহি বা সংৰক্ষণ কৰাৰ বিষয়ে সজাগতা সৃষ্টি কৰিব বিচৰা হৈছে।
