বিধানসভাৰ বাহিৰত নাগৰিকত্ব সংশোধনী বিধেয়কৰ বিৰোধিতাত সৰৱ হৈ অহা বিজেপিৰ মিত্ৰদল তথা চৰকাৰৰ অংশীদাৰ দল অগপৰ স্বৰূপ আজি উদং খালে কেবিনেট বৈঠকৰ সময়ত।
আজি অনুষ্ঠিত কেবিনেট বৈঠকৰ পূৰ্বে কালি এখন সংবাদমেলত অগপ দলৰ প্ৰতিনিধিসকলে সাংবাদিকৰ আগত কৈছিল যে তেওঁলোকে কেবিনেট বৈঠকত নাগৰিকত্ব সংশোধনী বিধেয়কৰ বিষয়টো উত্থাপন কৰিব আৰু মেঘালয়ৰ দৰে এটা সিদ্ধান্ত লোৱাৰ দাবী কৰিব । কিন্তু আজি মূৰকত দেখা গ’ল দলটোৰ প্ৰতিনিধিসকলে বিষয়টোত মূৰ পোলোকা মৰাৰ লগতে কেবিনেট বৈঠকত এই বিষয়ে টু শব্দ এটাও নক’লে।
দলটোৰ এই দুমুখীয়া চৰিত্ৰক লৈ আজি বিভিন্নজনে সমালোচনা কৰাৰ লগতে অসমৰ ৰাইজৰ দলটোৰ প্ৰতি মোহভংগ হোৱাৰ দৰে হৈছে। বৈঠকত উপস্থিত থকা দলটোৰ সভাপতি তথা কৃষি মন্ত্ৰী অতুল বৰা, দলৰ কাৰ্য্যকৰী সভাপতি তথা জলসম্পদ মন্ত্ৰী কেশৱ মহন্ত আৰু অসামৰিক যোগান বিভাগৰ মন্ত্ৰী ফণীভূষণ চৌধুৰীয়ে আজি বিধেয়কখনৰ প্ৰসংগ গুৰুত্বসহ উত্থাপন কৰিব বুলি সকলোৱে আশা কৰি আছিল। কিয়নো অগপ দলে বাহিৰত বিধেয়কখনৰ তীব্ৰ বিৰোধিতা কৰি অহাৰ লগতে এই বিধেয়ক বাতিল নকৰিলে মিত্ৰতা ভংগ কৰাৰ হুংকাৰ দি আহিছে। কেৱল সেয়াই নহয়, দলটোৰ নেতাসকলে, মেঘালয় চৰকাৰৰ উদাহৰণেৰে বিষয়টো আলোচনা কৰিবলৈ কেবিনেট বৈঠক দাবী কৰি আহিছিল।
কিন্তু ৰাইজৰ আৱেগ জয় কৰিবৰ বাবে বিষয়টোত ৰাইজৰ পক্ষত থকা দেখুৱাই বিভিন্ন প্ৰতিবাদী কাৰ্য্যসূচী, গণস্বাক্ষৰ অভিযান চলোৱাৰ পিছতো, কেবিনেট বৈঠকত মুখ বন্ধ ৰখাটোৱে ৰহস্যৰ সৃষ্টি কৰিছে।
আনহাতে বিজেপিৰ নেতা তথা উদ্যোগ মন্ত্ৰী চন্দ্ৰমোহন পাটোৱাৰীয়ে সংবাদ মাধ্যমক জনোৱামতে মুখ্য মন্ত্ৰী সোণোৱালে অগপৰ মন্ত্ৰীসকলক এই বিষয়টো উত্থাপন নকৰিবলৈ আগতীয়াকৈ অনুৰোধ জনাইছিল।
ইফালে অগপৰ সভাপতি তথা মন্ত্ৰী অতুল বৰায়ো সংবাদ মাধ্যমক কোৱামতে, মুখ্য মন্ত্ৰীয়ে অগপৰ মন্ত্ৰীকেইজনক আশ্বাস দিছে যে চৰকাৰে অসমীয়া ৰাইজৰ ক্ষতি হ’ব পৰা একো পদক্ষেপ নলয়। সেয়ে তেওঁলোকে বৈঠকৰ সময়ত এই বিষয়টো নুলিয়ালে।
অসমত চাৰিওফালে নাগৰিকত্ব সংশোধনী বিধেয়কখনৰ বিৰোধিতাত জনসাধাৰণে মূল্যৱান সময় আৰু শ্ৰম বলিদান দি থকাৰ সময়ত অগপ দলটোৰ এই দুমুখীয়া স্থিতিয়ে ৰাজ্যজুৰি আজি ক্ষোভৰ সৃষ্টি কৰা দেখা গৈছে। ছ’চিয়েল মিডিয়াতো দলটোক সমালোচনা-বিদ্ৰূপেৰে থকা-সৰকা কৰা দেখা গৈছে।
