এছিয়ান গেইমছত স্বৰ্ণ পদকৰ দাবীদাৰ মীৰাবাঈ চানুৰ যোগদান অনিশ্চিত

গ’ল্ডকষ্টত অনুষ্ঠিত হৈ যোৱা কমনৱেলথ গেইমছত ভাৰতৰ হৈ উজ্জ্বীৱিত প্ৰদৰ্শন দাঙি ধৰি সোণৰ পদক আজুৰি অনা মণিপুৰৰ মহিলা বক্সাৰ মীৰাবাঈ চানুৰ আসন্ন এছিয়ান গেইমছত যোগদানৰ আশী ক্ষীণ হৈ পৰিছে। বক্সাৰ গৰাকীৰ এই খবৰে এতিয়া মৰ্মাহত কৰিছে ভাৰতৰ ক্ৰীড়া প্ৰেমীক।

উল্লেখ্য যে পিঠিৰ বিষত জৰ্জৰিত তাৰকা ভাৰোত্তোলকগৰাকীয়ে কয়, ‘যোৱা ২৫ মে’ত পিঠিত বিষ অনুভৱ কৰো। চিকিৎসাৰ বাবে দিল্লী আৰু মুম্বাইলৈও গৈছো কিন্তু চিকিৎসকে এতিয়াও নিশ্চিত কৰিব পৰা নাই বিষৰ কাৰণ। এক্স-ৰেৰ লগতে অন্যান্য পৰীক্ষাতো ধৰিব পৰা নাই বিষৰ কাৰণ’।

অহা ১৮ আগষ্টৰ পৰা ইণ্ডোনেছিয়াৰ জাৰ্কাটাত অনুষ্ঠিত হ’ব লগা এছিয়ান গেইমছৰ বাবে মনোবল বৃদ্ধি কৰি ৰখা চানুৱে কয়, ‘প্ৰতিযোগিতাৰ বাবে সময় এতিয়াও আছে। প্রস্তুতিৰ বাবে মোক দুটা সপ্তাহৰ প্ৰয়োজন। যিয়েই নহওক বিষক একাষৰীয়া কৰি জাৰ্কাটালৈ ৰাওনা হ’ম’।

বিশ্ব চেম্পিয়ন আৰু কমনৱেলথ্‌ গেইমছত স্বৰ্ণ পদক অৰ্জন কৰা চানু এছিয়ান গেইমছতো স্বৰ্ণ পদকৰ প্ৰবল দাবীদাৰ। সেয়ে খেলুৱৈগৰাকীয়ে এতিয়াও মনোবল হেৰুওৱা নাই বৰঞ্চ প্ৰতিযোগিতাখনত অংশগ্ৰহণ কৰাৰ বাবে তেওঁ যথেষ্ট আশাবাদীহে।