সম্প্ৰতি উত্তৰ-পূবৰ ভ্ৰমণত থকা উপৰাষ্ট্ৰপতি ভেংকায়া নাইডুৱে কাইলৈ মণিপুৰ ভ্ৰমণ কৰিব। তাৰ বাবে যাৱতীয় সুৰক্ষা ব্যৱস্থা আৰু অন্যান্য প্ৰস্তুতি প্ৰায় সম্পূৰ্ণ কৰি তুলিছে ৰাজ্যৰ প্ৰশাসনে।
উপৰাষ্ট্ৰপতি হিচাপে নাইডুৰ এয়ে হ’ব প্ৰথম মণিপুৰ ভ্ৰমণ। চৰকাৰী সূত্ৰই জনোৱামতে, উপ-ৰাষ্ট্ৰপতিজনে ৰাজ্যিক ভিত্তিত আয়োজিত ‘কৃষকৰ উপাৰ্জন দ্বিগুণ কৰাৰ বাবে জৈৱবৈচিত্ৰ্য আৰু বহনক্ষম কৃষি” শীৰ্ষক এখন এদিনীয়া কৰ্মশালাৰ সামৰণি কাৰ্য্যসূচীত ভাগ ল’ব।
সূত্ৰটোৱে জনোৱা মতে, উপ ৰাষ্ট্ৰপতিজনে ইয়াৰ সামৰণি কাৰ্য্যসূচীত উপস্থিত সকলৰ সন্মুখত আধা ঘণ্টীয়া এটা ভাষণ দিব। অনুষ্ঠানটো ইম্ফলস্থিত কেন্দ্ৰীয় কৃষি বিশ্ববিদ্যালয় আৰু মণিপুৰ ৰাজ্য চৰকাৰে যুটীয়াভাৱে আয়োজন কৰিছে।
অনুষ্ঠানটো মণিপুৰৰ ৰাজ্যপাল ড০ নাজমা হেপতুল্লা, মুখ্য মন্ত্ৰী বীৰেন সিং, কৃষি মন্ত্ৰী ভি হাংখালিয়ান, বন আৰু পৰিৱেশ মন্ত্ৰী টি শ্যামকুমাৰ উপস্থিত থাকিব।
আনহাতে পুৱা ৰাজ্যৰ কৃষি মন্ত্ৰীজনে এই কৰ্মশালাখন উদ্বোধন কৰিব বুলি সূত্ৰটোৱে জনাইছে। কৰ্মশালাখনত কেন্দ্ৰীয় কৃষি বিশ্ববিদ্যালয়ৰ উপাচাৰ্য্য অধ্যাপক এম প্ৰেমজিৎ, মণিপুৰ বিশ্ববিদ্যালয়ৰ অধ্যাপক ডব্লিউ বিশ্বনাথ, ইনষ্টিটিউট অব বায়’ৰিছ’ৰ্চেছ এণ্ড ছাছটেইনেবল ডেভেলপমেণ্টৰ সঞ্চালক অধ্যাপক দীনবন্ধু চাহুকে ধৰি আন ভালেকইজন বিশেষজ্ঞ উপস্থিত থাকিব।
উল্লেখযোগ্য যে উপৰাষ্ট্ৰপতিজন বৰ্তমান অসম ভ্ৰমণত আছে। আজি তেওঁ অসম কৃষি বিশ্ববিদ্যালয়ত এটা অনুষ্ঠানত উপস্থিত আছিল।
