সম্প্ৰতি উজনি অসমত বৃদ্ধি পাইছে কাঠ, কয়লা আদিৰ অবৈধ বেহা। চুবুৰীয়া ৰাজ্য অৰুণাচল, নাগালেণ্ড আদিৰ পৰা গোপনে এচাম ৰাজনৈতিক নেতাৰ ছত্ৰছায়াত চলি থকা এই অবৈধ ব্যৱসায়ৰ বিষয়ে বন বিভাগে দেখিও চকুমুদা কুলিৰ ভাও জুৰিছে৷
ইয়াৰ মাজতে তিনিচুকীয়া জিলাৰ কাকপথাৰত অৰুণাচলৰ পৰা চোৰাংকৈ কঢি়য়াই অনা আৰ জে জি বি ৪৩৮৬ নম্বৰৰ এখন কয়লাভৰ্তি ট্ৰাক বৃহস্পতিবাৰে পুৱাই আৰক্ষীয়ে জব্দ কৰিবলৈ সক্ষম হয়৷ ঘটনাৰ বিৱৰণী অনুসৰি অৰুণাচল প্ৰদেশৰ খাৰচাঙৰ পৰা কাকপথাৰ হৈ ৫২ নং আৰু ধলা দিশেৰে ৩৭ নং ৰাষ্টীয় ঘাইপথেৰে সৰবৰাহ হয় চোৰাং কয়লা৷
আনহাতে, চোৰাং কয়লা কঢ়িওৱা গাড়ীৰ পৰা ১ লাখ টকা কমিছন বিচাৰি আৰক্ষীৰ জালত পৰে শদিয়া সমষ্টিৰ যুৱ কংগ্ৰেছৰ সম্পাদক সূৰুজ বড়া আৰু এজন সহযোগী৷ ইফালে, কয়লাৰ অবৈধ ব্যৱসায়ৰ লগত এগৰাকী বিজেপি নেতা জড়িত থকা বুলি স্পষ্ট হোৱাৰ পাছতো আৰক্ষীয়ে কোনো ভূমিকা গ্ৰহণ কৰা পৰিলক্ষিত হোৱা নাই৷ ইয়াক লৈ সৃষ্টি হৈছে তীব্ৰ প্ৰতিক্ৰিয়াৰ।
অভিযোগ অনুসৰি কয়লা ব্যৱসায়ৰ লগত জড়িত বিজেপি যুৱ মৰ্চাৰ শদিয়া মণ্ডলৰ সভাপতি বলিন হাতীবৰুৱাৰ ওপৰত ৰজাঘৰীয়াৰ কৃপা দৃষ্টিৰ বাবেই আৰক্ষী প্ৰশাসনে কোনো পদক্ষেপ গ্ৰহণ কৰা নাই৷ ৰাইজৰ এই অভিযোগৰ পাছত প্ৰশাসনে কি ব্যৱস্থা গ্ৰহণ কৰে সেয়া লক্ষণীয় হ’ব।
