‘আমাৰ ৰাজ্যখনক ভাৰতবৰ্ষৰ ভিতৰত আটাইতকৈ শক্তিশালী ৰাজ্য হিচাপে পৰিগণিত কৰাৰ বাবে আমি সকলোৱে ঐক্যবদ্ধভাৱে প্ৰচেষ্টা চলাব লাগিব। বৰাক-ব্ৰহ্মপুত্ৰ উপত্যকা, তিনিখন পাবৰ্ত্য জিলা আৰু ভৈয়ামত বসবাস কৰা সকলো শ্ৰেণীৰ ৰাইজে এই ক্ষেত্ৰত সহায়-সহযোগিতা আগবঢ়াব লাগিব। শান্তি-সমন্বয় আৰু ভাতৃত্ববোধৰ সমাজখন প্ৰতিষ্ঠা কৰাৰ ক্ষেত্ৰত ৰাজ্যখনৰ সকলো শ্ৰেণীৰ জনসাধাৰণে মানৱীয় অনুভূতিৰে উদ্বুদ্ধ হৈ কৰ্মত ব্ৰতী হ’ব লাগিব।’ দেওবাৰে নগাঁৱৰ চকলাঘাটস্থিত সোণাইপাৰ গৌৰীনাথ শিৱমন্দিৰ প্ৰাংগণত মহাৰুদ্ৰ যজ্ঞ আৰু নৱনিৰ্মিত মন্দিৰৰ প্ৰতিষ্ঠা অনুষ্ঠান উপলক্ষে আয়োজিত ধৰ্মালোচনী সভাত মুখ্য অতিথি হিচাপে অংশ গ্ৰহণ কৰি প্ৰদান কৰা ভাষণত মুখ্য মন্ত্ৰী সৰ্বানন্দ সোণোৱালে এই দৰে কয়।
উক্ত ধৰ্মালোচনী সভাত মুখ্য মন্ত্ৰীয়ে সোণাইপাৰ গৌৰীনাথ শিৱমন্দিৰ প্ৰাংগণত এটা ৰাজহুৱা গৃহ নিৰ্মাণৰ বাবে ২০ লাখ টকা আগবঢ়োৱা হ’ব বুলিও কয়। লগতে মুখ্য মন্ত্ৰী গৰাকীয়ে সকলো সময়তে দিহা-পৰামৰ্শ প্ৰদানেৰে গঠনমূলক সমালোচনাৰ জৰিয়তে চৰকাৰখনে ইতিবাচকভাৱে দৃঢ়তাৰে আগবাঢ়ি যোৱাত সহায় কৰিবৰ বাবেও ৰাইজক আহ্বান জনায়।
উক্ত অনুষ্ঠানটোত কৃষি মন্ত্ৰী অতুল বৰা, ৰাজহ আৰু দুৰ্যোগ ব্যৱস্থাপনা বিভাগৰ ৰাজ্যিক মন্ত্ৰী পল্লৱলোচন দাস, সাংসদ কামাখ্যা প্ৰসাদ তাচা, বিধায়দ্বয় ডিম্বেশ্বৰ দাস, আঙুৰলতা ডেকা, নগাঁও জিলাৰ উপায়ুক্ত, আৰক্ষী অধীক্ষককে ধৰি বহু গণ্য-মান্য আৰু ধৰ্মপ্ৰাণ ৰাইজ উপস্থিত থাকে।
