দেশৰ অন্য প্ৰান্তৰ লগতে কাৰ্বি আংলং জিলাতো উদযাপন কৰা হ’ল ৬৯ সংখ্যক গণৰাজ্য দিৱস। জিলাখনৰ ডিফুস্থিত চৰকাৰী ল’ৰা উচ্চতৰ মাধ্যমিক বিদ্যালয়ৰ খেলপথাৰত কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ৰাষ্ট্ৰীয় পতাকা উত্তোলন কৰে।
পতাকা উত্তোলনৰ পিছতে মুখ্য কাৰ্যবাহী সদস্য ৰংহাঙে নিজৰ ভাষণ প্ৰসংগত কয় যে যেতিয়ালৈ পৃথক কাৰ্বি আংলং ৰাজ্য গঠন নহয় তেতিয়ালৈ কাৰ্বি আংলংবাসীয়ে নিজৰ দাবী উত্থাপন কৰিয়েই থাকিব।
তেওঁ কয়, ‘পৃথক ৰাজ্য গঠন নোহোৱা পৰ্যন্ত আমি দাবী উত্থাপন কৰি থাকিবই লাগিব। পৃথক ৰাজ্যৰ দাবীত বহু লোক ছহীদ হৈছে। এই ছহীদসকলৰ আত্মাই চিৰশান্তি লাভ কৰাৰ বাবে মই প্ৰাৰ্থনা জনাইছো। এতিয়া আমি জাতি, ধৰ্ম নিৰ্বিশেষে সকলোৱে পৃথক ৰাজ্যৰ বাবে দাবী তুলিব লাগিব’।
ইয়াৰ উপৰি ৰংহাঙে বিজেপি চৰকাৰে দৰিদ্ৰ সীমা ৰেখাৰ তলৰ পৰিয়াল সমূহক উজ্জ্বল আঁচনিৰ অধীনত LPG গেছ প্ৰদান কৰা তথা স্বচ্ছ ভাৰত আদিৰ দৰে কাৰ্যসূচীৰো শলাগ লয়।
ভাৰতৰ স্বাধীনতা সংগ্ৰামত ছহীদ হোৱা তথা জড়িত হোৱা লোক সকলকো শ্ৰদ্ধাৰে সোঁৱৰে।
তাৎপৰ্যমূলক কথা যে মুখ্য কাৰ্যবাহী সদস্যজনে ইংৰাজী, অসমীয়া আৰু কাৰ্বি তিনিওটা ভাষাতে ভাষণ প্ৰদান কৰে। পৃথক ৰাজ্যৰ দাবী সম্বলিত ভাষণ তেওঁ কাৰ্বি ভাষাত প্ৰদান কৰে। আনহাতে আটাইকেইটা ভাষাতে তেওঁ বিজেপিৰ জয় গান গোৱা পৰিলক্ষিত হয়।
