আন্তঃৰাষ্ট্ৰীয় যোগ দিৱসৰ কাৰ্য্যসূচীত ২১ জুনত প্ৰধান মন্ত্ৰী নৰেন্দ্ৰ মোদীয়ে ডিঙিত গামোচা লৈ ভাগ লোৱাক লৈ মোদীক তীব্ৰ কটাক্ষ কৰিছে প্ৰাক্তন মুখ্য মন্ত্ৰী তৰুণ গগৈয়ে।
মোদীয়ে ‘লেৰেলা মৰম দেখুৱাইছে’ বুলি কটাক্ষ কৰি গগৈয়ে সংবাদমেলত কয় যে যদি মোদীৰ অসমলৈ মৰম আছে তেন্তে নাগৰিকত্ব বিধেয়কখন বাতিল কৰক।
যদি মোদীৰ প্ৰকৃতাৰ্থত মৰম আছে, তেন্তে অসমৰ বিশেষ মৰ্য্যাদাটো কিয় কাটি দিলে বুলিও গগৈয়ে প্ৰশ্ন কৰে। ‘গামোচাখন নিপিন্ধিলেও হ’ব, মনমোহন সিঙেও গামোচা পিন্ধা নাছিল। কিন্তু মনমোহনে অসমলৈ দিয়া ধনৰ যদি চাৰিভাগৰ এক অংশও প্ৰদান কৰিলেহেঁতেন!’ গগৈৰ মন্তব্য।
আনহাতে যোগাসন কৰাটো প্ৰদৰ্শনৰ কথা নহয় বুলি মন্তব্য কৰি প্ৰাক্তন মুখ্য মন্ত্ৰীজনে দাবী কৰে যে বিজেপি চৰকাৰে যোগ দিৱসটো ৰাজনীতিকৰণ কৰি পেলাইছে আৰু সেয়ে কংগ্ৰেছে যোগ দিৱসত অংশগ্ৰহণ কৰা নাই।
‘জৱাহৰলাল নেহৰু, ইন্দিৰা গান্ধীয়েও যোগাসন কৰিছিল। ময়ো যোগাসন কৰো। যোগাসনটো কোনো দেখুৱাই কৰা কথা নহয়,’ মোদীৰ যোগাসনক লৈ গগৈৰ মন্তব্য।
