গৌৰীসাগৰত নিশা শুই থকা অৱস্থাতে এজন লোকৰ অস্বাভাৱিক মৃত্যু
শিৱসাগৰ জিলাৰ জয়সাগৰ আৰক্ষী চকীৰ অন্তৰ্গত ভটীয়াপাৰ ৰূপহীমুখ গাঁৱৰ পংকজ হাজৰিকা নামৰ বিবাহিত যুৱকজনৰ যোৱ শুকুৰবাৰে নিশা শহুৰয়েকৰ ঘৰত শুই থকা অৱস্থাতে মৃত্যু ঘটে।
ঘটনাৰ বিৱৰণি মতে গাওঁখনৰ নিবাসী প্ৰয়াত দিলীপ হাজৰিকাৰ পুত্ৰ পংকজ হাজৰিকা ব্যৱসায়ৰ সূত্ৰে পৰিয়ালসহ গুৱাহাটীত অস্থায়ীভাৱে বসবাস কৰে। কিন্তু কেইদিনমানৰ পূৰ্বে গুৱাহাটীৰ পৰা অহা যুৱকজনে ৰূদ্ৰসাগৰত থকা শহুৰেক বাপুকন দাসৰ গৃহতে আছিল।
আন দিনৰ দৰে শুকুৰবাৰেও যুৱকজনে নিশা শহুৰৰ ঘৰৰ পৰিয়ালৰ সৈতে একেলগে আহাৰ গ্ৰহণ কৰি শহুৰেকৰ সৈতে একেখন বিচনাতে শুই পৰে।
কিন্তু পিছদিনা পুৱা পৰিয়ালৰ লোকে জোঁৱায়েক শুই নুঠাত আৰু কোনো মাত কথা নোহোৱাত শিৱসাগৰ অসামৰিক চিকিৎসালয়লৈ নিয়ে যদিও চিকিৎসকে যুৱকজনক মৃত বুলি ঘোষণা কৰে।
আনহাতে অমায়িক যুৱকজনৰ মৃত্যুত ৰূপহীমুখ বটবৃক্ষ সাংস্কৃতিক গোষ্ঠী, কৃষক মুক্তি সংগ্ৰাম সমিতিৰ ৰূদ্ৰসাগৰ আঞ্চলিক সমিতি, অসম জাতীয়তাবাদী যুৱ ছাত্ৰ পৰিষদৰ ৰূদ্ৰসাগৰ আঞ্চলিক সমিতি, ৰূপহীমুখ বৰনামঘৰ পৰিচালনা সমিতিকে ধৰি বিভিন্ন অনুষ্ঠান-প্ৰতিষ্ঠানে শোক প্ৰকাশ কৰিছে।