‘চহিদ শম্ভুধন ফংলু হ’ল দেশ মাতৃৰ হকে চৰম ত্যাগৰ প্ৰতিভূ। নৈতিক সাহস, সৱল চৰিত্ৰ, দৃঢ়তা, অসীম দেশ প্ৰেমৰ এক উজ্জ্বল নিদৰ্শন আছি এইগৰাকী চহিদ। এই গৰাকী মহান চহিদে দেখুৱাই যোৱা আদৰ্শৰে আমি সমাজ নিৰ্মাণৰ কামত ব্ৰতী হ’ব লাগিব।’ আজি ডিমা হাচাও জিলাৰ মাইবআং চহৰৰ দিছু খেলপথাৰত চহিদ শম্ভুধন ফংলুৰ ১৬৮ সংখ্যক জন্ম বাৰ্ষিকী অনুষ্ঠানত অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে ভাষণ প্ৰসংগত এইদৰে কয়।
মুখ্য মন্ত্ৰী গৰাকীয়ে কয় যে জিলাখনক সকলো দিশতে আগবঢ়াই নিয়াৰ বাবে ৰাজ্য চৰকাৰে ইতিমধ্যে পদক্ষেপ গ্ৰহণ কৰিছে।
লগতে মুখ্য মন্ত্ৰী গৰাকীয়ে কয় যে, ‘কৰ্কট ৰোগৰ চিকিৎসাৰ বাবে হাফলঙত এখন কৰ্কট ৰোগৰ চিকিৎসালয়, শিক্ষাৰ দিশত আগবঢ়াই নিয়াৰ উদ্দেশ্যে এখন বি এড মহাবিদ্যালয় স্থাপন আৰু এখন উদ্যান শস্য মহাবিদ্যালয় স্থাপনৰ দিশত আমি অগ্ৰসৰ হৈছো।’
অনুষ্ঠানটোত মুখ্য মন্ত্ৰী গৰাকীয়ে অসামৰিক বিষয়া সকলক প্ৰশিক্ষণ প্ৰদানৰ বাবে উমৰাংছুত এটা অত্যাধুনিক প্ৰশিক্ষণ কেন্দ্ৰ স্থাপন কৰা হ’ব উল্লেখ কৰে। ইতিমধ্যে প্ৰশিক্ষণ কেন্দ্ৰটো স্থাপনৰ বাবে ডিমা হাচাও স্বায়ত্ত শাসিত পৰিষদে ১ হাজাৰ বিঘা মাটি আবণ্টন দিয়া বুলি সৰ্বানন্দই উল্লেখ কৰি কয় যে কেন্দ্ৰটো স্থাপনৰ লগে লগে অঞ্চলটোৱে বিকাশৰ এক নতুন মাত্ৰা লাভ কৰিব।
আজিৰ অনুষ্ঠানতে মুখ্য মন্ত্ৰী গৰাকীয়ে গাঁও বুঢ়া সকলক তেওঁলোকৰ পাৰিতোষিক আনুষ্ঠানিকভাৱে প্ৰদান কৰাৰ লগতে থাইলেণ্ডত অনুষ্ঠিত মিষ্টাৰ এছিয়াৰ প্ৰথম ৰাণাৰ্ছআপ খিতাপ অৰ্জন কৰা প্ৰণৱ লাংথাছাক সম্বৰ্ধনা জনায়। আৰম্ভণিতে মুখ্য মন্ত্ৰী গৰাকীয়ে মাইবাং চহৰৰ প্ৰৱেশ পথত স্থাপন কৰা বীৰ ডিমালিক কেমপ্ৰাইৰ প্ৰতিমূৰ্তি আনুষ্ঠানিকভাৱে উদ্বোধন কৰে।
অনুষ্ঠানটোত অসম বিধানসভাৰ প্ৰাক্তন অধ্যক্ষ তথা হাউছফেডৰ অধ্যক্ষ ৰঞ্জিত দাস, বিধায়ক ঋতুপৰ্ণ বৰুৱা, ডিমা হাচাও স্বায়ত্ত শাসিত পৰিষদৰ অধ্যক্ষ ৰাণু লাংথাছা, ৰাজ্যিক পৰ্যায়ৰ ছত্ৰ আৰু যুৱ কল্যাণ উপদেষ্টা সমিতিৰ সদস্য-সচিব লক্ষ্য কোঁৱৰকে ধৰি বহু সংখ্যক গণ্য-মান্য ব্যক্তি উপস্থিত থাকে।
