ৰাজ্যখনত পোনপ্ৰথম বাৰৰ বাবে আয়েজিত নাগালেণ্ড অলিম্পিক মঙলবাৰে আবেলি ডিমাপুৰ জিলা ক্ৰীড়া ক্ষেত্ৰত এক জাকজমকতা পূৰ্ণ অনুষ্ঠানৰ মাজেৰে আৰম্ভ হয়। নাগা যুৱপ্ৰজন্মৰ প্ৰতিভাক বিষেশভাবে প্ৰদৰ্শিত কৰা উদ্বোধনী অনুষ্ঠানটোৰ সহস্ৰাধিক ক্ৰীড়াপ্ৰেমী ৰাইজ সাক্ষী হৈ ৰয়। নাগালেণ্ড অলিম্পিক সন্থাই ৰাজ্য চৰকাৰৰ সহযোগত আয়োজন কৰা উক্ত অনুষ্ঠানটো শুভ উদ্বোধন কৰি ৰাজ্যপাল পি বি আচাৰ্যই নাগা সকলক অদ্বিতীয় বুলি উল্লেখ কৰি লগতে কয় যে এয়া নাগালেণ্ডবাসীৰ বাবে এক ঐতিহাসিক মুহূৰ্ত।
মন কৰিবলগীয়া যে ১৬ ডিচেম্বৰৰ লৈকে চলিবলগীয়া এই চাৰি দিনীয়া অনুষ্ঠানটো ৩টা ভিন্ন স্থলীত অনুষ্ঠীত হ’ব যত ৰাজ্যখনৰ ১১ খন জিলাৰ পৰা ১২০০ ত কৈ বেছি প্ৰতিযোগীয়ে উশ্বু, ৰেষ্টলিং, ভলিবল, টাইকোৱাণ্ড’, টেবল টেনিছ্, ল’ন টেনিছ ফুটবল, আৰ্চাৰি, এথলেটিকছ আৰু ছেপাক-টাক্ৰ’ আদি বিভাগত অংশ ল’ব।
খেলসমূহৰ কাৰিকৰী কমিটিৰ তত্ত্বাৱধানত প্ৰতিটো বিভাগৰ অনুষ্ঠান সমূহ ৰাজ্যৰ সংশ্লিষ্ট ক্ৰীড়া সংস্থা সমূহৰ দ্বাৰা পৰিচালিত হয়।ইয়াৰ আগেয়ে জিলাসমূহৰ উপায়ুক্ত সকলক, যি জিলা ক্ৰীড়া কাউঞ্চিলসমূহৰ অধ্যক্ষও হয়, সংশ্লিষ্ট জিলা দল সমূহৰ দ্বায়িত্ব দিয়া হয়।
খেলখনৰ উদ্যোক্তা কমিটিয়ে ইতিপূৰ্বে প্ৰত্যেক জিলাৰে জিলা দল বিলাকলৈ খেলুৱৈ নিৰ্বাচন, প্ৰশিক্ষণ, ইউনিফৰ্ম, কিট আৰু অনুষ্ঠান স্থলীৰ পৰা অহা-যোৱা কৰাৰ উদ্দেশ্যে যাতায়তৰ ব্যৱস্থা আদিৰ বাবে প্ৰস্তুতিমূলক অনুদান আগবঢ়াই থৈছিল। প্ৰত্যেক জিলা দলতেই একোজনকৈ ‘চেফ – ডে – মিছন’, বিভাগীয় টীম মেনেজাৰ, বিভাগীয় অতিৰিক্ত টীম মেনেজাৰ, টীম মেনেজাৰ আৰু প্ৰত্যেক বিভাগৰে একোজনকৈ প্ৰশিক্ষক থাকিব। অংশগ্ৰহণকাৰী সকলক নিজৰ নিজৰ কিট আৰু ইউনিফৰ্মৰ লগতে আঁঠুৱা আৰু শোৱাপাটী লৈ আনিবলৈ নিৰ্দেশ দিয়া হৈছে।
নাগালেণ্ড অলিম্পিক সন্থাই লগতে নিশ্চিত কৰে যে বহু প্ৰতীক্ষিত উক্ত অনুষ্ঠানটোলৈ নাগালেণ্ড চৰকাৰৰ স্বীকৃতি তথা সমৰ্থন আছে আৰু ই অলিম্পিক চাৰ্টাৰৰ অধীনত অনুষ্ঠীত হ’বলগীয়া এক বাধ্যতামুলক অনুষ্ঠান।
আনহাতে উদ্বোধনী অনুষ্ঠানটোত নাগালেণ্ডৰ বিভিন্ন ৰক বেণ্ড তথা অন্যান্য শিল্পীৰ দ্বাৰা পৰিৱেশিত অনুষ্ঠানে তাত উপস্থিত অগণন ক্ৰীড়াপ্ৰেমীক মন্ত্ৰমুগ্ধ কৰি তোলে। অনুষ্ঠানটোত লোক সভাৰ সাংসদ নেইফিও ৰিঅ’ ও উপস্থিত থাকে।
