জ্যোতি চিত্ৰবনত আৰম্ভ দ্বিতীয় গুৱাহাটী চলচ্চিত্ৰ মহোৎসৱ : আজি প্ৰদৰ্শন ওম ৰাউটৰ ‘লোকমান্য-এক যুগপুৰুষ’

ডাঃ বৰদলৈয়ে কয় ‘ছবি এখন চাই ভাল পোৱাটো চাইনিজ ফুড খাই ভালপোৱা লেখীয়া কথা। চাইনিজ ফুড অথবা মাছৰ খাৰ সৰুৰে পৰা খালেহে তাৰ আচল সোৱাদটো পোৱা যায়, ঠিক সেইদৰে চলচ্চিত্ৰ চোৱাৰ অভ্যাসটো গঢ়ি তুলিলেহে এখন ছবিৰ অন্তৰ্নিহিত ভাবধাৰাসমূহ অনুধাৱন কৰিব পৰা যায়।’

পেৰিচত আন্তঃৰাষ্ট্ৰীয় চলচ্চিত্ৰ মহোৎসৱত এখন চলচ্চিত্ৰ চাই থকা সময়ত তেওঁ সেই চলচ্চিত্ৰৰ একো অৰ্থ বুজি পোৱা নাছিল বুলি জনাই সেই প্ৰসংগত তেওঁ চাইনিজ ফুড আৰু মাছৰ জোলৰ উদাহৰণ দাঙি ধৰা বুলি ভাষণ প্ৰসংগত উল্লেখ কৰে।

তেখেতৰ অদাহ্য নামৰ ছবিখন আন্তঃৰাষ্ট্ৰীয় চলচ্চিত্ৰ মহোৎসৱৰ প্ৰদৰ্শিত হোৱাৰ সময়ৰ কেইটিমান অভিজ্ঞতা কথা উল্লেখ কৰে। লগতে কলকাতা তথা পুনেত তেওঁৰ ছবিখনে ভাল সমাদৰ লাভ কৰা বুলিও মন্তব্য কৰে।

আনহাতে সেই একেখন সভাতে উপস্থিত থকা ৰাষ্ট্ৰীয় স্বয়ংসেৱক সংঘৰ অখিল ভাৰতীয় প্ৰচাৰ প্ৰমুখ ড০ মনমোহন বৈদ্যই ভাষণ প্ৰদান কৰি কয় ‘ইয়াত চলচ্চিত্ৰ জগতৰ বহু জ্ঞান থকা ব্যক্তি উপস্থিত আছে। এই ক্ষেত্ৰখনত মই একেবাৰে নতুন। আপোনালোকে ধৰি ল’ব পাৰে যে মই প্ৰাক প্ৰাথমিক বিদ্যালয়ত নাম লগাইছো মাত্ৰ।’

তদুপৰি আৰ এচ এচৰ নেতাজনে কয় যে তেওঁ বিগত চাৰিবছৰ ধৰি চলচ্চিত্ৰ জগতখনৰ ওপৰত কিছু অধ্যয়ন কৰিছে তথা এই জগতখনৰ সৈতে জড়িত কিছুসংখ্যক অভিজ্ঞ ব্যক্তিৰ সৈতে চলচ্চিত্ৰৰ বিষয়ত আলোচনা কৰিছে।

তেওঁৰ মতে ‘চিনেমা হৈছে জনসাধাৰণক কাহিনীৰ বিষয়ে অৱগত কৰোৱা এটা মাধ্যম। সংগীত, নৃত্য আৰু অভিনয়ৰ সংমিশ্ৰণেই হৈছে চিনেমা’।

তেওঁ কয় ‘আমাৰ ভাৰতবৰ্ষত যিদৰে হলিউড তলিউড আছে তেনেকৈ ফ্ৰান্সত ফ্ৰে’ন্সউড, জাৰ্মানীত জাৰ্মানউড নাই।’

তদুপৰি তেওঁ ইৰান তথা বেলজিয়ামৰ চলচ্চিত্ৰসমূহে সেই দেশসমূহৰ সমাজ ব্যৱস্থাৰ আভাস দিয়ে বুলি মন্তব্য কৰি কয় ‘ভাৰতীয় সমাজ ব্যৱস্থা কেনেকুৱা সেয়া ১০ খন হিন্দী চিনেমা চালেও আপোনালোকে অনুধাৱন কৰিব নোৱাৰিব।’

উদ্বোধনী অনুষ্ঠানত অতিথি হিচাপে উপস্থিত থকা নয়ন প্ৰসাদে কয় ‘সাধাৰণতে ভাৰতীয় মানুহৰ চিনেমাৰ ধাৰণাটো মুম্বাইৰ হিন্দী চিনেমা আৰু হলিউডৰ চিনেমা। এই ধাৰণাই তেওঁলোকক এনেভাৱে গ্ৰাস কৰি ৰাখিছে যে বেলেগ কোনো ভাষাৰ চিনেমাৰ অনুধাৱন কৰিব নোৱাৰে।’

এনে পৰিপ্ৰেক্ষিতত আন্তঃৰাষ্ট্ৰীয় চলচ্চিত্ৰ মহোৎসৱ অনুষ্ঠিত কৰাটো অত্যন্ত প্ৰয়োজনীয় বুলি প্ৰসাদে মন্তব্য কৰে। লগতে গুৱাহাটীত যোৱা তিনিবছৰ ধৰি সেই পৰিৱেশ গঢ় লৈ উঠাটো অসমবাসীৰ বাবে গৌৰৱৰ কথা বুলি তেওঁ কয়।

গুৱাহাটী প্ৰেছ ক্লাবৰ সম্পাদক নৱ ঠাকুৰীয়াই কয় ‘প্ৰথম অৱস্থাত চিনেমা যাদু আছিল। লাহে লাহে ই শিল্পকলাত পৰিণত হ’ল।’

তদুপৰি বৰ্তমান সময়ত ইন্টাৰনে’টে বাতৰিকাকত, থিয়েটাৰ, চলচ্চিত্ৰ সকলো গ্ৰাস কৰি পেলাইছে বুলি তেওঁ মন্তব্য কৰে।

ইয়াৰোপৰি চিনেমা আৰু ইন্টাৰনেটৰ পাৰ্থক্যটো লাহে লাহে নোহোৱা হৈ যাব বুলি মন্তব্য কৰি তেওঁ কয় ‘ভৱিষ্যত প্ৰজন্মই নিউয়ৰ্কত মুক্তি পোৱা চিনেমা এখন ভাৰততে থাকি একেসময়তে উপভোগ কৰিব পাৰিব।’

আনহাতে চলচিত্ৰমৰ সাধাৰণ সম্পাদক ভগৱত প্ৰীতম দত্তই নৰ্থ ইষ্ট নাওক জনাই যে ‘ভাৰতবৰ্ষত চলচ্চিত্ৰৰ এটা বৃহৎ উদ্যোগ আছে যদিও ভাৰতীয় চলচিত্ৰসমূহত ভাৰতীয়ত্ব লাহে লাহে নাইকিয়া হৈ গৈছে। সুস্থ চলচ্চিত্ৰৰ ধাৰাটো পুনৰ প্ৰৱৰ্তন কৰাৰ বাবে এনেধৰণৰ চলচ্চিত্ৰ মহোৎসৱৰ আয়োজন কৰা হৈছে। এই মহোৎসৱ আমি দ্বিতীয় বাৰৰ বাবে অনুষ্ঠিত কৰিছো।’