বনৰীয়া ঘোঁৰাৰ বাবে বিখ্যাত শদিয়াৰ ডিব্ৰু-ছৈখোৱা ৰাষ্ট্ৰীয় উদ্যানত আজিৰ পৰা আৰম্ভ হ’ল হাতী ছাফাৰি। এই হাতী ছাফাৰিৰ শুভ উদ্বোধন কৰে বন মন্ত্ৰী প্ৰমীলা ৰাণী ব্ৰহ্মই । এ’ভাৰগ্ৰীন আৰ্থ, ছৈখোৱা বন্যপ্ৰাণী সংৰক্ষণ বিভাগ আৰু হাতীঘুলি পৰিৱেশ কমিটীৰ যুটীয়া প্ৰচেষ্টাত এই হাতী চাফাৰিৰ কাৰ্য্যসূচীটো ৰূপায়ণ কৰা হৈছে। শুভাৰম্ভণি অনুষ্ঠানত বন মন্ত্ৰী প্ৰমীলা ৰাণী ব্ৰহ্মৰ লগতে শদিয়াৰ বিধায়ক বলীন চেতিয়াও উপস্থিত আছিল। উল্লেখযোগ্য যে পূৰ্বতে ডিব্ৰু-ছৈখোৱা ৰাষ্ট্ৰীয় উদ্যানত হাতীৰ ছাফাৰিৰ সুবিধা নথকাৰ বাবে দেশী-বিদেশী পৰ্যটকসকল বনৰীয়া ঘোঁৰা চোৱাত অসুবিধাৰ সন্মুখীন হৈছিল। অনহাতে জীপ ছাফাৰি কৰিব পৰাকৈ ৰাস্তা-ঘাটৰ অৱস্থা উন্নত নহয়। জানিব পৰা মতে এই পৰ্য্যন্ত উদ্যানখনত কেৱল নাও ছাফাৰি আৰু ট্ৰেকিংৰ ব্যৱস্থা আছিল। হাতী ছাফাৰিৰ সংযোজনে ইয়াত এক নতুন মাত্ৰা দিব বুলি আশা কৰা হৈছে। আজি পুৱাৰ ভাগত বিদেশী পৰ্যটকসকলক বিভিন্ন জীৱ-জন্তুৰ লগতে বনৰীয়া ঘোঁৰা দেখি সন্তুষ্টি প্ৰকাশ কৰা দেখিবলৈ পোৱা গৈছিল।
