আজি হাফলঙত আয়োজিত এক সংবাদ মেলযোগে ডিমা হাচাও বিজেপিৰ প্ৰাক্তন সভাপতি দেবেন থাউচেনে অচিৰেই বিজেপি ত্যাগ কৰি অগপত যোগদান কৰাৰ কথা ঘোষণা কৰে। প্ৰদেশ বিজেপিৰ সাধাৰণ সম্পাদক তথা ডিমা হাচাও বিজেপিৰ প্ৰভাৰী মৃগাঙ্ক বৰ্মনৰ বিৰুদ্ধে বিস্ফোৰক অভিযোগ উত্থাপন কৰি থাউচেনে কয় যে বৰ্মনে ‘পাৰ্বত্য পৰিষদখনক চিন্ডিকেট কালেকচন থলী বুলি ভাবে’ আৰু তেওঁৰ অপসাৰণত বৰ্মনৰ পৰোক্ষ ষড়যন্ত্ৰ আছে।
সংবাদ মেলখনত থাউচেনে অভিযোগে কৰে যে তেওঁক কোনো ধৰণৰ জাননী নিদিয়াকৈ অবৈধভাৱে বিজেপি জিলা সভাপতি পদৰ পৰা খেদি পঠোৱা হৈছে। তেওঁ লগতে কয় যে সাংগঠনিক নিৰ্বাচনত সংখ্যাগৰিষ্ঠ ভোট লাভ কৰি সভাপতি নিৰ্বাচিত হোৱাৰ পাছৰে পৰা স্বায়ত্ত শাসিত পৰিষদৰ একাধিক ইএমে ফোনত তেওঁক ধমকি দিছে।
প্ৰদেশ বিজেপিৰ সভাপতি ৰঞ্জিত কুমাৰ দাসক নীচ মানসিকতাৰ মানুহ বুলি অভিযোগ কৰি থাউচেনে লগতে কয় যে ৰঞ্জিত দাসে ফোনত সৰুসুৰা কথা সুধি থাকে আৰু তাৰ ম’বাইল ৰেকৰ্ডিং প্ৰয়োজনত তেওঁ ৰাজহুৱা কৰিব।
এনে নীচ মানসিকতাৰ ব্যক্তিয়ে অসম কেনেকৈ চলাব পাৰিব বুলি প্ৰশ্ন তুলি থাউচেনে কয় যে গেৰুৱা দলে ‘চবকা সাথ চবকা বিকাশ’ৰ কথা ক’লেও বাস্তৱত বিজেপি ক্ষমতালৈ অহাৰ পাছত ডিমা হাচাও জিলাত কি হৈছে সেয়া বৰ্ণনাতীত।
উল্লেখযোগ্য যে থাউচেনক অপসাৰণ কৰি নিপ’লাল হোজাইক সভাপতিৰ আসনত বহুওৱা হৈছিল।
