মাৰ্ঘেৰিটা নগৰ তথা ইয়াৰ উপকণ্ঠ অঞ্চলৰ একাংশ নৱপ্ৰজন্ম বৰবিহ সদৃশ ড্ৰাগছৰ কৰাল গ্ৰাসত পৰাত অভিভাৱক তথা অঞ্চলসমূহৰ সচেতন লোক চিন্তিত হৈ পৰা পৰিলক্ষিত হৈছে।
মংগলবাৰে মাৰ্ঘেৰিটাৰ ২ নং লাজুম গাঁৱৰ ৰাইজে মাৰ্ঘেৰিটা মহকুমাধিপতি কাৰ্যালয়ত উপস্থিত হৈ মহকুমাধিপতি পলাশ ৰাজকুমাৰ আহোমক অঞ্চলটোত দীৰ্ঘদিন ধৰি চলি থকা ড্ৰাগছ, কানি আদি মাৰত্মাক দ্ৰব্যৰ প্ৰচলন বন্ধৰ দাবীত এখন স্মাৰক পত্ৰ প্ৰদান কৰে।
বৃহত্তৰ ২ নং লাজুম অঞ্চলটোত দীৰ্ঘদিন ধৰি চলি অহা ড্ৰাগছ, কাণি, অবৈধ চুলাই মদ আদিৰ বেহা আৰু সেৱনে অঞ্চলটোত সামাজিক পৰিৱেশ বিনষ্ট কৰাৰ লগতে নৱপ্ৰজন্ম বিপদগ্ৰস্ত কৰি তোলাত অঞ্চলটোৰ অভিভাৱক তথা সচেতন ৰাইজ শংকিত হৈ পৰিছে।
এইক্ষেত্ৰত মহকুমা প্ৰশাসনক ব্যৱস্থা গ্ৰহণৰ দাবীৰে মহকুমাধিপতিক আজি স্মাৰক পত্ৰ প্ৰদান কৰে সচেতন ৰাইজে।
ইয়াৰ পাছতে মাৰ্ঘেৰিটা মহকুমা আৰক্ষী বিষয়া পাৰ্থ প্ৰতিম দাস (আইপিএছ)ৰ বালুখাদস্থিত কাৰ্যালয়ত উপস্থিত হৈ ২ নং লাজুম গাঁৱৰ ৰাইজে স্মাৰক পত্ৰৰ প্ৰতিলিপি প্ৰদান কৰি অনতিপ্ৰলমে অঞ্চলটোত প্ৰচলন হৈ থকা মাৰাত্মক ড্ৰাগছ আৰু মাদক দ্ৰব্যৰ প্ৰচলন বন্ধৰ দাবী উত্থাপন কৰে।
ছাত্ৰ ছাত্ৰী তথা নৱপ্ৰজন্মৰ জীৱন সুৰক্ষাৰ দাবীৰে আজি ২ নং লাজুমৰ গাঁৱৰ শতাধিক সচেতন লোক একত্ৰিত হৈ এই স্মাৰক পত্ৰ প্ৰদান কৰা বুলি জানিবলৈ দিয়ে।
উল্লেখ্য যে অসমৰ মুখ্যমন্ত্ৰীয়ে ড্ৰাগছৰ বিৰোধে আৰাক্ষীক কঠোৰ অভিযান চলাবলৈ নিৰ্দেশ দিয়াৰ পাছতো মাৰ্ঘেৰিটাত আৰক্ষীয়ে ড্ৰাগছ বেহা আৰু সৰবৰাহকাৰীৰ বিৰুদ্ধে যি ধৰণৰ ব্যৱস্থা গ্ৰহণ কৰিব লাগে সেই ধৰণৰ ব্যৱস্থা গ্ৰহণ নকৰাৰ অভিযোগ উত্থাপন হোৱাৰ লগতে সচেতন লোকসকল আৰক্ষীৰ বিৰুদ্ধে ক্ষুব্ধ হৈ পৰিছে বুলি জানিব পৰা গৈছে।
