যোৰহাট আৰক্ষীয়ে বৃহস্পতিবাৰে তিতাবৰ নগৰ সমিতিৰ প্ৰাক্তন অধ্যক্ষ আবু নাছিৰ আহমেদক চৰকাৰী পুঁজিৰ আত্মস্যাতৰ অভিযোগত গ্ৰেপ্তাৰ কৰে। অভিযোগ অনুসৰি আহমেদে ২০১৫-১৭ দুই বিত্তীয় বৰ্ষত প্ৰায় ২৭ লাখ চৰকাৰী পুঁজিৰ ধনৰ আত্মস্যাতৰ লগত জড়িত আছিল।
আৰক্ষীয়ে কয় যে বুধবাৰে নিশা আটক কৰি অনা আহমেদক ভাৰতীয় দণ্ডবিধিৰ ৪০৬, ৪২০ আৰু ৪০৯ ধাৰাৰ অধীনত ৭৫৫/২০১৮ নং গোচৰ মৰ্মে গ্ৰেপ্তাৰ কৰা হয়। উক্ত গোচৰটো কেইদিনমান আগতে যোৰহাট আৰক্ষী থানাত পঞ্জীয়ন কৰা হৈছিল বুলি আৰক্ষী সূত্ৰই জানিবলৈ দিয়ে।
আৰক্ষী সূত্ৰই লগতে জানিব দিয়া মতে আহমেদে ছেলফ চেক ইচ্যু কৰি চৰকাৰী পুঁজিৰ ধন আত্মস্যাৎ কৰাৰ অভিযোগ তুলি এগৰাকী স্থানীয় বাসিন্দা নৱজ্যোতি দাসে তেওঁৰ বিৰুদ্ধে এখন এজাহাৰ দাখিল কৰিছিল। এই এজাহাৰৰ ভিত্তিতে আৰক্ষীয়ে এক গোচৰ ৰুজু কৰি আহমেদক গ্ৰেপ্তাৰ কৰে।
বৃহস্পতিবাৰে এখন ন্যায়িক আদালতত হাজিৰ কৰোৱাৰ পিছত আহমেদক পাঁচ দিনৰ আৰক্ষী জিম্মালৈ প্ৰেৰণ কৰা হয়।
