মিজোৰাম চৰকাৰৰ সাহায্য মৰ্যাদাৰ অন্তৰ্গত নামমাত্ৰ অনুদানৰ (lumpsum grant in aid status) অন্তৰ্গত ব্য়ক্তিগত খণ্ডৰ মধ্য আৰু উচ্চ মাধ্যমিক বিদ্যালয়সমূহত কৰ্মৰত শিক্ষকসকলে অনিৰ্দিষ্টকালীন ধৰ্মঘটৰ কাৰ্যসূচী গ্ৰহণ কৰিছে। শিক্ষকসকলে তেওঁলোকৰ মৰ্যাদা উন্নীত নকৰা পৰ্যন্ত, অন্ততঃ তেওঁলোকৰ দৰমহা তদৰ্থক (ad hoc ) সাহায্যপ্ৰাপ্ত মৰ্যাদালৈকে উন্নীত নকৰা পৰ্যন্ত শিক্ষাদান নকৰাৰ স্থিতি গ্ৰহণ কৰিছে। সেই উদ্দেশ্যে শিক্ষকসকলে তেওঁলোকৰ ধৰ্মঘটৰ এই কাৰ্যসূচী ”নো’ টিচিং ডে’’ হিচাপে পালন কৰাৰ কঠোৰ স্থিতি গ্ৰহণ কৰিছে।
শিক্ষকসকলৰ এই ধৰ্মঘটে ৰাজ্যখনৰ প্ৰায় ৩০০০ ছাত্ৰ-ছাত্ৰীক প্ৰভাৱিত কৰাৰ আশংকাই দেখা দিছে। মিজোৰাম চৰকাৰী সাহায্যপ্ৰাপ্ত বিদ্যালয় সংস্থা (Mizoram Government Aided School Association) নামৰ এটা সংস্থাৰ অধীনত প্ৰতিবাদী কাৰ্যসূচী গ্ৰহণ কৰা শিক্ষকসকলে প্ৰকাশ কৰিছে যে বিগত দিনসমূহত ৰাজ্য চৰকাৰে তেওঁলোকক ভালেমান প্ৰতিশ্ৰুতি প্ৰদান কৰি আহিছে যদিও এতিয়ালৈকে সেইসমূহ পালন কৰা নাই।
মিজোৰাম চৰকাৰী সাহায্যপ্ৰাপ্ত বিদ্যালয় সংস্থাৰ সভাপতি চি লালগাইজুৱালাই কৈছে যে বিদ্যালয়সমূহে চৰকাৰৰ পৰা অতি নগন্য পৰিমাণৰ- বছৰি মাথোঁ ১.৫ লাখ টকা অনুদান হিচাপে লাভ কৰি আহিছে, যাৰ বাবে তেওঁলোকে অত্যন্ত আৰ্থিক সমস্যাৰ মাজেৰে চলি থাকিবলগীয়া হৈছে। ফলত শিক্ষকসকলে মাহৰ পাছত মাহ পৰ্যন্ত পৰ্যাপ্ত দৰমহা অবিহনেই পাৰ কৰিবলগীয়া হৈ আহিছে। শিক্ষকসকলে গাঁৱবাসীকলৰ কৃপা তথা অনুদানেৰে বৰ্তি থাকিবলগীয়া হৈছে বুলিও তেওঁ কয়।
সংস্থাৰ সভাপতিগৰাকীয়ে কৈছে , ”২০০৮ চনত চৰকাৰে আমাক সাহায্য মৰ্যাদাৰ অন্তৰ্গত নামমাত্ৰ অনুদান প্ৰদান কৰিছিল আৰু আমি লাভ কৰা সেই যৎসামান্য ধনেৰে বিদ্যালয়সমূহ চলাই আহিছিলোঁ। প্ৰথমতে আমাৰ ৮২ খন বিদ্যালয় আছিল যদিও পুঁজিৰ অভাৱৰ বাবে ভালেমান বিদ্যালয় বন্ধ কৰি দিয়া হয়। এতিয়া আমাৰ ৬১খন বিদ্যালয় ন্যূনতম সা-সুবিধাখিনিঅবিহনেই চলি আছে।”
প্ৰতিবাদী কাৰ্যসূচীৰ প্ৰতিফল ৩০০০ শিক্ষাৰ্থীয়ে ভুগিব বুলি অৱগত হোৱাৰ পাছতো প্ৰতিবাদী কাৰ্যসূচী চলাই যাবলৈ মনস্থ কৰাৰ কথা ঘোষণা কৰি মিজোৰাম চৰকাৰী সাহায্যপ্ৰাপ্ত বিদ্যালয় সংস্থাৰ তৰফৰ পৰা কোৱা হৈছে যে কোনো বিকল্প নথকা বাবেহে এই প্ৰতিবাদী কাৰ্যসূচী গ্ৰহণ কৰিছে সংস্থাটোৱে। সংস্থাৰ তৰফৰ পৰা আৰু কোৱা হৈছে যে যদিহে তেওঁলোকৰ দাবী পূৰণ কৰা নহয়, তেতিয়া তেওঁলোকৰ হাতত বিদ্যালয়সমূহ অনিৰ্দিষ্ট কাললৈ বন্ধ কৰি দিয়াৰ গত্যন্তৰ নাথাকিব।
উল্লেখ্য যে মিজোৰামত ৬০ খন নামমাত্ৰ অনুদানপ্ৰাপ্ত মজলীয়া আৰু উচ্চ মাধ্যমিক বিদ্যালয় আছে। এই বিদ্যালয়সমূহৰ শিক্ষকসকলেও উচ্চতৰ মাধ্যমিক বিদ্যালয়ৰ এই ধৰ্মঘটত যোগদান কৰি সম মৰ্যাদা দাবী কৰিব।
উল্লেখ্য যে মিজোৰাম চৰকাৰৰ সাহায্য মৰ্যাদাৰ অন্তৰ্গত নামমাত্ৰ অনুদান লাভ কৰা উচ্চতৰ মাধমিক বিদ্যালয় সংস্থাই (Mizoram Government Lumpsum Grant in Aid Higher Secondary School Association) তেওঁলোকৰ মৰ্যাদা আৰু দৰমহা তদৰ্থক সাহায্যপ্ৰাপ্ত মৰ্যাদালৈকে উন্নীত কৰাৰ দাবীৰে বিগত ২ সপ্তাহ ধৰি ধৰ্মঘট কৰি আহিছে।
